Ndër ca sipërmarrës të kthyer nga emigrimi, më të cilët kryeministri Rama pati një bashkëbisedim në Sarandë, ra në sy dhe një i kthyer pas 17 vitesh në SHBA. Quhet Romeo Dauti. Është bërë lajm që para pak vitesh për kthimin e tij, pra nuk i përkiste ekskluzivisht pranisë te Rama. Ndaj, kjo është më e pakta gjë që duhet të dijë ajo masë e çmendur anti-qeveri e anti-Rama në rrjete sociale, e cila i është vërsulur duke e etiketuar si “patronazhist”.
Tjetra që duhet ditur është se ky djalë nga fshatrat e Devinës i përket një fisi anti-komunist, të fisëm, soj e me aftësi në shumëçka. Pra, as nga tradita nuk ka ndonjë lidhje me socialistët. Mirëpo ne po jetojmë kohët e një 97-te mediatike, asaj në rrjete sociale, ku siç kallashi në 97-ën politike shqiptare, sot kërcet ai i etiketimeve, sharjeve e fyerjeve në rrjete sociale ndaj dhe më të fismit njeri.
Po, Romeo Dauti është ndër ata që shqiptarë të kthyer para pak vitesh, i cili e kishte lënë Shqipërinë që në vitet ’90 dhe hasi në Sarandë e një lloj tregu turistik e jo vetëm me shumë interes, sidomos në imobilare. Dhe, sa me një formim të lindur prej biznesmeni të aftë e sa të kultivuar nga kultura amerikane e të bërit biznes, e kapi shumë shpejt një lloj Amerike në Sarandë më të mirë se Amerika. Më saktë, lodhej me pak se në Amerikë dhe fitonte më shumë. Dhe po ashtu, kishte më shumë kohë se në Amerikë për të qenë pranë familjes e për të shijuar sa më shumë pushime. Ndaj dhe pohoi “15 pushimet” në viti në Shqipëri, gjë që Amerika nuk ja jepte si mundësi. Këtë e ka pohuar edhe kur është intervistuar më herët, pa sfond politik, e pohon në rrethe shoqërore, por me sinqeritetin që e karakterizon e pohoi dhe te takimi me Ramën. E pohoi si Romi e aspak si patronazhist, duke mos qenë absolutisht i tillë, madje duke e dëgjuar për herë të parë si term me ngarkesë politike.
Pra, ky është Romeo Dauti, një person që ata të cilët e njohin nga afër, do dëshironin që një shoqëri të kishte sa më shumë të tillë si ai: një shqiptar i aftë, i paqtë, i edukuar, mirëbërës, një model edhe atdhedashjeje, pa fjalë, pa gjoksrrahje, thjesht me karakter pozitiv e stil shembullor jete, familjar e shoqëror.
