Ish-kreu i UÇK-së e njëherësh ish-presidenti i Kosovës, Hashim Thaçi, një hero në mesin e një pjese të ishbashkatdhetarëve të tij për udhëheqjen e kryengritjes kundër qeverisë serbe në vitet 1998-99. e cila përfundimisht çoi në pavarësinë e Kosovës, del të hënën para gjykatës në Hagë për krime të dyshuara lufte.
Në nëntor 2020, Gjykata Speciale për Krimet e Luftës në Kosovë, me seli në Hagë, e paditi Thaçin për krime lufte dhe krime kundër njerëzimit. Ai akuzohet për përndjekje, vrasje, torturë, zhdukje me forcë dhe krime të tjera të kryera gjatë luftës për pavarësi në 10 pika të aktakuzës.
Ish-presidenti 54-vjeçar dha dorëheqjen si kreu i shtetit menjëherë pas aktakuzës dhe u raportua në njësinë e paraburgimit të gjykatës në Hagë. Tre nga bashkëpunëtorët e tij më të ngushtë, duke përfshirë dy ish-kryetarë të parlamentit, Rexhep Selimi, Jakup Krasiniqi dhe Kadri Veseli, përballen me të njëjtat akuza.
Gjykata Speciale për Kosovën ka për qëllim të hetojë krimet e supozuara të kryera nga ish-pjesëtarët e UÇK-së kundër pakicave etnike dhe kundërshtarëve politikë në periudhën nga janari 1998 deri në dhjetor 2000. Ndërsa luftimet u qetësuan dhe forcat serbe u tërhoqën për shkak të bombardimeve të NATO-s, Thaçi e ndërroi uniformën e tij ushtarake komanduese me një kostum dhe kravatë blu dhe hyri në politikë.
Kur Kosova shpalli pavarësinë në vitin 2008, ai ishte kryeministër dhe në vitin 2016 u bë president. Në prag të fillimit të gjyqit, në mbarë Kosovën u shfaqën postera me fotografi të Thaçit dhe ish-kryeparlamentarit Veseli, me shkrimin “Heronjtë e luftës dhe të paqes”.
Të dielën është paralajmëruar një protestë në Kosovë në mbështetje të ish-mbrojtësve të UÇK-së. Por, nga ana tjetër, ka nga ata që shpresojnë se gjyqi është shansi i fundit për të mësuar se çfarë ka ndodhur me të dashurit e tyre. Në mesin e tyre është edhe Olgica Bozaniç, e cila ende po përpiqet të zbulojë se çfarë ka ndodhur saktësisht me vëllezërit e saj, Todor dhe Llazar Kostiç, eshtrat e të cilëve u gjetën në një varr masiv në perëndim të Kosovës në vitin 2005.
Ai varr masiv mbulohet nga një aktakuzë. “Ne e dimë nga deklaratat e dëshmitarëve se ata u morën nga fshati me burra të tjerë në korrik 1998 dhe se ata u torturuan. Por ne nuk e dimë se kur dhe si u vranë, ndoshta detajet do të dalin në gjyq,” tha Bozaniç.
Nga ana tjetër, lobuesi kryesor te bashkësia ndërkombëtare që Thaçi është i pafajshëm, është kryeministri Rama. Jo vetëm për të, Rama e ka shndërruar në kredo politike avokatinë mbi ish-udhëhëeqjen e UÇK-së që ndodhet në Hagë. /tesheshi.com/
