Ndoshta disi papritur, në raundin e dytë të zgjedhjeve presidenciale, në “megdanin” e presidentit aktual të Malit të Zi, Milo Gjukanoviç, do të paraqitet edhe Jakov Milatoviç, kandidati i lëvizjes Evropa Tani, shkruajnë disa media malazeze, duke iu referuar një figure të re në politikën e atyshme, të ngjashme së paku aparencialisht me Dritan Abazoviçin.
I këndshëm për syrin, siç e përshkruajnë ata, Milatoviçi elokuent, i arsimuar dhe simpatik është prototipi i një lloji të ri politikani. Jakov Milatoviç, kur studiohet më me kujdes biografia e tij politike, është një kandidat i djathtë, jo i moderuar, por pak më i ashpër.
Paraqitja, narrativa, edukimi, të gjitha këto janë gjëra që krijojnë mashtrim kur bëhet fjalë për Jakov Milatoviçin, thotë Danilo Kaleziç, bashkëpunëtor në Universitetin e Malit të Zi. Ai thekson se për profilin politik të Milatoviçit duhet të tregojë më së shumti fakti që ai ka qenë anëtar i qeverisë “apostolike” të Krivokapiçit dhe tani, ndoshta edhe më shumë, fakti që ai haptazi merr mbështetje nga strukturat politike pro-serbe në Mal të Zi.
Dhe pse është kështu, Kaleziç ka një përgjigje të thjeshtë:
“Kur është fjala për kandidatin Milatoviç, bëhet fjalë ekskluzivisht për kandidatin rezervë të Aleksandër Vuçiçit, pra një njeri i krijuar politikisht në laboratorin e Kishës Ortodokse Serbe dhe në shërbimet e inteligjencës së Rusisë dhe Serbisë dhe që si i tillë është një kurth për votuesit malazezë të cilët duhet të besojnë se të rinjtë dhe arsimi në Evropës Perëndimore garantojnë përparimin. Në këtë rast, është krejt e kundërta, sepse njeriu në një farë mënyre mishëron një ideologji konservatore ultra të djathtë, e maskuar nga populizmi i lirë”, thotë Kaleziç.
Një gjë tjetër, shton Kaleziç, ilustron qartë se çfarë lloj kandidati është dhe çfarë lloj idesh politike promovon në të vërtetë dhe cila do të jetë axhenda e tij politike.
“Reagimet pas kalimit në raundin e dytë janë konfirmimi më i mirë i kësaj. Reagimet nga Serbia dhe DF dhe entuziazmi që mbretëron në elektoratin e madh serb tregojnë më së miri se Milatoviçi është një kandidat i tillë; pra e kundërta e progresistit dhe largpamësit”, thotë Kaleziç.
Përplasja mes Milo Gjukanoviçit dhe Jakov Milatoviçit do të jetë një luftë për thelbin e Malit të Zi, pra do të zgjidhet mes kandidatëve me vlera diametralisht të kundërta politike, ideologjike dhe të gjitha vlerat e tjera. /tesheshi.com/
