Personi që u “kruajt” me ish-boksierin Mike Tyson në avion, si pasojë e së cilës hëngri disa grushta deri në gjakosje në fytyrë, ka një të kaluar problematike, zbuluan mediat.
Ai quhet Melvin Townsend dhe është 36 vjeç.
Raportohet se Townsend ka disa dënime me akuzat për mashtrim, grabitje, posedim droge dhe shitje të mallrave të vjedhura.
Townsend është burgosur të paktën dy herë, herën e parë për 20 muaj dhe të dytën për 15 muaj të tjerë.
Ish-kampioni i peshave të rënda e humbi durimin kur një pasagjer pas tij, në kabinën e avionit të nisur për në Florida, nisi ta bezdiste. Më herët ata kishin patur një komunikim miqësor.
Por siç u pa në video, parsagjeri 36-vjeçar po luante pas shpinës së ish-boksierit famoz, deri në pikën sa ky i fundit nuk duroi dot më dhe u kthye duke i dhënë “ca të mira”.
Natyrisht, çështja mori përmasa të mëdha, por nuk duket se ka shumë shqetësime për ngatërresa të mëtejshme nga ana e 55-vjeçarit, siç deklaroi dhe avokati i tij.
“Fatkeqësisht, z. Tyson u përfshi në një incident gjatë fluturimit me një pasagjer agresiv, i cili e ngacmoi dhe më pas i hodhi një shishe me ujë teksa ishte ulur në ndenjësen e tij”, tha ai.
Sipas raportimeve, policia e San Franciskos iu përgjigj thirrjes për “dy persona të përfshirë në incident”, njëri prej të cilëve mori ndihmën e parë për lëndime të lehta, /tesheshi.com/
