Kamala Harris, nënpresidentja aktuale e Shteteve të Bashkuara të Amerikës, është bërë zëvendësuesja kryesore e mundshme e Joe Biden si kandidate demokrate në zgjedhjet presidenciale.
Vetë Joe Biden shprehu mbështetjen për zëvendëspresidenten e tij në Rrjetin X pasi ai u tërhoq nga gara.
Kamala Harris, 59 vjecce, është një ish-senatore nga shteti i Kalifornisë. Gjatë zgjedhjeve presidenciale 2020, ajo kandidoi për presidente, por humbi garën partiake. Pas kësaj, ajo mbështeti Joe Biden, i cili e zgjodhi atë si zëvendëspresidente të tij në gusht 2020.
Kështu, ajo u bë gruaja e parë me ngjyrë e zgjedhur si zëvendëspresidente, gruaja e parë dhe amerikanja e parë me origjinë nga Azia Jugore që mbajti atë pozicion.
Si zëvendëspresidente, ajo merrej më së shumti me çështjet e migracionit dhe të drejtën e votës.
Jeta e hershme dhe private
Ajo ka lindur më 10 tetor 1964 në Oakland, Kaliforni. Nëna e saj, Shymala Gopalan, emigroi në SHBA nga India në vitin 1960 për të ndjekur një doktoraturë në endokrinologji në Universitetin e Berkeley. Babai, Donald Harris, është me origjinë nga Xhamajka dhe është profesor në Universitetin e Stanfordit. Kamala ka një motër më të vogël, Maya.
Harris mori diplomën e saj për drejtësi nga Shkolla e Drejtësisë e Universitetit të Kalifornisë Hastings në 1989.
Burri i saj, Doug Emhoff, është një avokat. Ata u martuan në vitin 2014. Kamala dhe Doug nuk kanë fëmijë së bashku, por ai ka dy fëmijë nga martesa e tij e parë.
Fillimet e një karriere
Harris filloi të punojë si prokuror në Kaliforni. Në vitin 1998, ajo u bë Ndihmës Prokurore e Qarkut në San Francisko, pas së cilës ajo drejtoi Seksionin e Familjes dhe Fëmijëve të Zyrës së Prokurorit të Qytetit të San Franciskos.
Në vitin 2003, ajo u zgjodh prokurore e qarkut të San Franciskos, si gruaja e parë që mbajti atë post. Ajo e mbajti atë detyrë deri në vitin 2010, kur u zgjodh prokurore e shtetit.
Ajo hyri në Senat në vitin 2016 si pasardhëse e Barbara Boxer. Gjatë mandatit të saj në Senat, ajo shërbeu në Komitetet e Gjyqësorit dhe të Inteligjencës.
Pak para se të betohej si zëvendëspresidente në janar 2021, Harris dha dorëheqjen nga Senati, raporton CBS News. /tesheshi.com/
