Valentina Galatova është ushtarja e parë ruse e vrarë në luftën në Ukrainë.
Mjekja 27-vjeçare, nënë e një djali 8-vjeçar, ndërroi jetë në Mariupol muajin e kaluar. Megjithatë, vdekja e saj u bë e ditur vetëm 24 orë më parë. Ajo studioi Psikologji në Donetsk në Ukrainën lindore dhe pasi filloi pushtimi rus më 24 shkurt, u bashkua me forcat e separatistëve pro-rusë duke shërbyer si mjeke.
Sipas mediave ruse, Galatova vdiq në prill në një sulm me mortaja gjatë rrethimit të qytetit port strategjik. E lindur në Siberi në vitin 1994, ajo u zhvendos në Voronezh, 160 km nga kufiri me Ukrainën, kur ishte e re.
Një vit më parë, burri i saj u vra në luftimet në Donetsk, kuptohet, si prorus.
Sipas Times të Londrës, mediat ruse konfirmuan vdekjen e saj pas varrimit që iu bë pranë Voronezhit.
Pas vdekjes së çiftit, rritjen e djalit të saj 8-vjeçar do ta marrë nëna e Valentinës. Vlen të theksohet se rreth 41 mijë gra shërbejnë në Forcat e Armatosura Ruse, megjithëse atyre u ndalohet të jenë në vijën e parë të luftës.
Në të kundërt, në ushtrinë ukrainase gratë përbëjnë 15% dhe lejohen të shërbejnë në pozicionet e betejës. Ndër të rënat me emër është dhe 48-vjeçarja Olga Semindianova, nënë e 12 fëmijëve e cila u vra pranë Donetskut marsin e kaluar. /tesheshi.com/
