Avdullah Hoti bëhet kryeministri i 8-të i Kosovës së pasluftës, duke zëvëndësuar Albin Kurtin, zëvëndës i të cilit ishte deri dje në qeverinë LDK-VV, e nga i cili ka marrë vlerësime publike negative.
I lindur në vitin 1976, në një fshat në afërsi të Rahovecit, Hoti ka përfunduar Fakultetin Ekonomik në Universitetin e Prishtinës.
Studimet e Magjistraturës dhe të Doktoratës për ekonomi i ka kryer mes viteve 2001 dhe 2007, në Staffordshire University në Britani të Madhe.
Që nga viti 1998 ka ligjëruar në Universitetin e Prishtinës, njëherë si asistent dhe nga viti 2012 si profesor në drejtimet bachelor, master dhe doktoraturë.
Në vitet 2010-2013 ka qenë nënkryetar i Komunës së Prishtinës, ndërkohë që kryetar ishte Isa Mustafa.
Në vitin 2014, Hoti është zgjedhur për herë të parë deputet i Kuvendit të Kosovës.
Ai e ka lënë postin e deputetit dhe është bërë ministër i Financave në qeverinë e udhëhequr nga Mustafa, të cilin e ka dhe mik të ngushtë.
Në vitin 2017, ai ka qenë i nominuar për kryeministër në listën zgjedhore, por LDK-ja nuk mundi t’i fitojë zgjedhjet.
Në zgjedhjet e vitit 2019, LDK doli e dyta Hoti ishte personi i dymbëdhjetë më i votuar në zgjedhje.
Hoti u shkarkua si zv/kryeministër nga Albin Kurtit, sapo qeveria e këtij të fundit u rrëzua me mosbesim pas 51 ditësh në pushtet.
Tej jetës politike, në aspektin e një vokacioni publik për cilësi të veçanta, nuk gëzon ndonjë autoritet.
I ka dhënë peshë si emër vetëm jeta politike.
Ndërkohë, në profilin politik nuk rrezaton asgjë të veçantë që bën diferencën.
Në artikulimin politik është në nivel mesatar.
Prezantimi prej tij programit qeverisës, ishte në kufijtë e të mërzitshmes: i gjithë skematik dhe i paralexuar. /tesheshi.com/
