Polonia do të blejë 250 tanke amerikane Abrams të versionit të fundit, sipas një marrëveshje me vlerë gati gjashtë miliardë dollarë, tha të mërkurën ministri i Mbrojtjes Mariusz Blaszczak.
“Polonia do të blejë 250 tanke amerikane Abrams. Sigurisht, kjo është një përgjigje ndaj sfidave me të cilat përballemi në drejtim të sigurisë ndërkombëtare. Detyra jonë është të parandalojmë një agresor të mundshëm. Të gjithë e dimë se ku është ai agresor,” tha ai në një konferencë për shtyp, duke hamendësuar për Rusinë.
Ashtu si shumë vende të tjera të Evropës Lindore, Polonia është e shqetësuar për ndërhyrjen dhe luftarakitetin në rritje të Rusisë, e cila në 2014 aneksoi gadishullin e Krimesë, deri në atë kohë pjesë e Ukrainës.
Ministri specifikoi se paketa prej gjashtë miliardë dollarësh përfshin gjithashtu logjistikën dhe trajnimin e shoqëruar, rinovimin dhe modernizimin e infrastrukturës dhe municionit.
Tanke të blinduara
Sa i përket Abrams, ai sqaroi se këto janë tanke të blinduara të versionit M1A2 SEPv3.
Jaroslaw Kaczynski, nënkryeministri i ngarkuar me sigurinë kombëtare dhe presidenti i Partisë në Drejtësi të Ligjit dhe Drejtësisë (PiS), gjithashtu konfirmoi se “forcat e armatosura të Polonisë do të jenë më të pasura me 250 tanke Abrams, më modernet në botë”, dhe se e para nga dërgesat pritet vitin e ardhshëm.
Në gusht të vitit 2020, Pentagoni njoftoi dërgimin e trupave shtesë në Poloni, ku do të bashkohet me një kontigjent prej 4,500 trupash amerikanë të vendosur tashmë në krahun lindor të NATO-s në Evropë. /tesheshi.com/
