Numri i zv.kryeministrave ka rikthyer përplasjet mes kryeministrit aktual Ramush Haradinajt dhe atij të kaluar Isa Mustafa se cili kush më shumë ka emëruar militant në këtë pozitë.
E gjitha ka nisur pasi Haradinaj ka deklaruar se numri i zv/ministrave në qeverinë e kaluar, ishte më i lartë por që emrat nuk u bënë të ditur, emra që sipas tij ekzistojnë të dokumentuar.
“Kufizimi i numrit të zv ministrave është rezultat i mënyrës se si është bërë kjo qeveri. Kushdo qoftë, partitë e koalicionit që kemi formuar qeverinë kuptohet që i kanë pritjet e veta për përfaqësim ashtu siç e thatë edhe komunitet edhe gjithë të tjerët. Sa i përket qeverisë mund të përshpejtojmë procesin, por nuk e kam përkrahjen për ligjin e ndryshimit në Qeveri. Nuk është lajm i mirë numri i madh i zv/ministrave, në fakt është ende nën numrin e qeverisë së mëhershme por as kjo nuk është arsyetim, të ndiqen rregullat e tillë.Numrin e tillë nuk e kanë bërë të ditur por janë gjëra që ekzistojnë të dokumentuara. Nuk po lëvdohem për këtë. Diku 74 i ka pas para meje, por nuk është bë publik por janë të dhënat për këtë. Obligohemi që këta zëvendës të paktën të nxjerrin rrogën e vetë duke i shërbyer qytetarëve e besoj që është e drejtë”, tha Haradinaj pas akuzave të deputetes të Vetëvendosje-s Albulena Haxhiu për mosinicimin e ligjit që kufizon numrin e zv.ministrave.
Por i menjëhershëm ka qenë reagimi i Isa Mustafës i cili e quan të pavërtetë këtë deklaratë, madje thotë se numri i zv.ministrave në kabinetin e tij ishte jo më shumë se 47.
“Duhet të reagoj për një të pavërtetë, që lexova se kryeministri Haradinaj e kishte thënë në Kuvend, se Qeveria ime ka pasur më shumë zv.ministra. Numri maksimal në çdo periudhë të Qeverisë time nuk ka kaluar 47 zv. ministra. Edhe kjo ka qenë shumë. Të gjithë emrat mund të publikohen”, ka shkruar kreu i LDK-së. /tesheshi.com/
