Nuk është popullsia serbe ajo që po sulmon Policinë e Kosovës në veri, por grupe kriminale të atyshme. Këtë e potencoi me forcë kryeministri Kurti në një konferencë për media, pas ngjarjes së rëndë në mesnatë në Leposaviq, ku si pasojë e të shtënave nga serbë të lidhur me struktura kriminale, mbeti i vrarë polici Afrim Bunjaku nga Vushtrria.
“Nuk bëhet fjalë as për civilë të armatosur as për qytetarë të zakonshëm po bëhet fjalë për një formacion me pjesëtarë që janë profesionistë ushtarakë ose policorë në Zveçan rrotull Manastirit të kishës atje.
Siç mund të shihen nga pamjet e kamerave, automjetet janë pa targa dhe nuk janë të serbëve lokalë dhe as të qytetarëve të Kosovës. Nga pamjet shihen kamionë që kanë bllokuar rrugën dhe një person me një armë në krahë që nuk është tipik për policinë. Shihen njerëz me pajisje ushtarake me maska rrotull manastirit në Banjskë të Zveçanit. Organe tona të sigurisë dhe prokuroria do të vijojnë me hetimet në lidhje me këto forca.
Përveç makinave aty ka edhe një autoblind që nuk është i Policisë së Kosovës.
Është e qartë që këto persona që janë të paktën 30 vetë paraqesin një formacion të organizuar që duket se ka ardhur të luftojë në Kosovë, por unë ju bëjnë thirrje që t’u dorëzohen organeve të drejtësisë. Kosova është vend demokratik dhe u përket të gjithëve pa dallim etnie dhe cënime të tilla janë të patolejueshme”, tha Kurti, duke dhënë detaje mbi autorët e sëlmit më të fundit nën terrin e natës, me pasojë jetëhumbjen e një polici kosovar.
Për Kurtin, nuk ka asnjë dyshim që, siç tha ai, “krimi i organizuar me mbështetje politike financiare dhe logjistike nga Beogradi zyrtar po e sulmon shtetin tonë”.
“Në këtë betejë ne mbrojmë dhe zbatojmë ligjshmërinë dhe mbrojmë Kosovën e pavarur. Kriminelët do të dështojnë, do të kapen dhe do të dënohen”, ishin fjalët e të parit të qeverisjes së Kosovës.
Kurti theksoi se vrasja e policit Bunjaku duhet të kthehet në angazhim edhe më të shtuar në luftimin e bandave dhe strukturave ilegale që e cenojnë sigurinë e rendin kushtetues. /tesheshi.com/
