Një qëndrim i fundit i Gjykatës së Strasburgut mbi vrasjen ende të pazbardhur të Aleks Nikës në ngjarjen tragjike të 21 Janarit 2011 me katër jetëhumbje, rihap dhe njëherë çështjen e nxehtë të viteve më parë, ku si qeveria e asaj kohe e si drejtësia është e kompromentuar rëndë.
“Autoritetet shqiptare duhet të identifikojnë dhe ndëshkojnë përgjegjësit për vrasjen e të afërmit të kërkueseve gjatë protestës së vitit 2011 përpara Kryeministrisë”, deklaron Gjykata e Strasburgut në vendimin për Aleks Nikën, publikuar në faqen zyrtare të kësaj gjykate.
Në vendimin e publikuar së fundmi theksohet se Gjykata Evropiane e të Drejtave të Njeriut gjeti, njëzëri, se ka pasur dy shkelje të nenit 2 (e drejta për jetën dhe për hetim) të Konventës Evropiane të të Drejtave të Njeriut: ”vrasja dhe më pas moszbardhja e vrasjes”.
“Çështja lidhej me vdekjen e bashkëshortit dhe babait të kërkueseve pasi ishte qëlluar me një plumb në kokë në vitin 2011 gjatë një proteste përpara Kryeministrisë. Gjatë protestës kishte pasur përballje të dhunshme midis demonstruesve dhe autoriteteve. Kërkuesit pretenduan në veçanti se komandanti i përgjithshëm i Gardës së Republikës, i ngarkuar me mbrojtjen e Kryeministrisë, kishte urdhëruar vartësit e tij të hapnin zjarr ndaj protestuesve. Dhoma gjeti se çështja e përgjegjësisë së mundshme të zinxhirit komandues nuk ishte zbardhur nga hetimi përkatës, i cili ishte përqendruar në përgjegjësinë individuale të oficerëve të Gardës dhe jo në sekuencën apo natyrën e urdhrave që mund të ishin dhënë nga zinxhiri komandues i Gardës”, theksohet në vendim.
“Kishte pasur gjithashtu edhe një sërë mangësish të tjera në hetim, duke përfshirë fshirjen e video-regjistrimeve të incidentit dhe mos-ndjekjen e disa pistave kyçe të hetimit, si shenjat e plumbave të gjetura në lartësinë e njeriut në gardhin e hekurt që rrethon Kryeministrinë. Këto mangësi ngritën dyshime se autoritetet ishin përpjekur ta devijonin apo të ndërhynin në hetim padrejtësisht. Dhoma gjeti gjithashtu të meta në kornizën ligjore që rregullonte në atë kohë përdorimin e armëve të zjarrit në kontekstin e tubimeve masive, si dhe defekte serioze në planifikimin dhe kontrollin e protestës. Autoritetet vendase nuk dëshmuan se përdorimi i forcës vdekjeprurëse nga oficerët e Gardës që rezultoi në vdekjen e të afërmit të kërkueseve, kishte qenë absolutisht i nevojshëm. Në fakt, vetë Qeveria Shqiptare pranoi se përdorimi i forcës kishte qenë i tepruar”, deklarohet më tej në vendimin e Gjykatës së Strasburgut.
Trupa gjyqësore vendosi se, sipas nenit 46 (forca detyruese dhe ekzekutimi i vendimeve)autoritetet duhet të vazhdojnë përpjekjet për zbardhjen e vdekjes së të afërmit të kërkueseve dhe të identifikojnë e ndëshkojnë përgjegjësit.
Kujtojmë se atë ditë humbën jetën, veç Aleks Nikës, Ziver Veizi, Hekuran Deda dhe Faik Myrtaj. Kjo përgjakje me katër jetë të humbura në bulevardin “Dëshmorët e Kombit” ishte epilog i një proteste të PS, me aspekte të dhunshme, ndërmarrë pas një videoje me fabul korruptive të Ilir Metë, ahere në qeveri në aleancë me Berishën. /tesheshi.com/
