Ish-kryeministri i Pakistanit, Imran Khan po trajtohet në spital pas një atentati që e la atë me plagë plumbash, me mbështetësit e tij që u zotuan të vazhdojnë “marshimin e gjatë” në Islamabad kundër qeverisë.
Sulmi i djeshëm në autokolonën e tij – i kryer me sa duket nga një person i armatosur – vrau një person dhe plagosi të paktën 10 të tjerë, duke përshkallëzuar më tej tensionet në Pakistan, i cili është zhytur në një krizë të thellë politike që nga rrëzimi i Khan në prill. Ish-ylli i kriketit është “në një gjendje të qëndrueshme dhe është mirë” në spitalin e Lahores ku po trajtohet, tha mjeku i tij.
70-vjeçari Khan të premten e kaluar filloi një “marshim madhështor” në Islamabad ku morën pjesë mijëra mbështetës të tij, duke kërkuar zgjedhje të parakohshme, hapi i parë për t’u rikthyer në pushtet. Ai u qëllua të paktën një herë në këmbën e djathtë gjatë sulmit kur një person hapi zjarr me një armë automatike në kontejnerin e montuar në një kamion nga i cili zakonisht Khan i drejtohet turmës në fillim të marshimit.
Atentati ndodhi në Wazirabad, rreth 170 kilometra në lindje të kryeqytetit Islamabad. “Të gjithë ata që qëndronin në vijën e parë u goditën,” tha Fawad Chaudhry, një ish-ministër informacioni në qeverinë Khan. Ishte “një tentativë për ta vrarë, për ta vrarë”, tha Rauf Hassan, një këshilltar i afërt i ish-kryeministrit.
Disa anëtarë të partisë së tij, Pakistani Tehreek-e-Insaf (PTI), janë në mesin e të plagosurve dhe partia ka akuzuar qeverinë se qëndron pas sulmit, gjë të cilin qeveria e ka mohuar fuqishëm.
Marshimi vazhdon
Chowdhury sqaroi se kuadrot e PTI do të takohen për të diskutuar strategjinë që duhet ndjekur në “marshimin e gjatë”, duke u zotuar se do të vazhdojë. “Marshi i madh për liri të vërtetë do të vazhdojë dhe lëvizja për të drejtat e njeriut gjithashtu, derisa të ketë shpalljen e zgjedhjeve”, tha ai në Twitter.
Që kur u rrëzua si kryeministër pas një mocioni për shkarkimin e qeverisë së tij në prill, Khan nuk ka reshtur së kërkuari për zgjedhje të parakohshme, duke u mbështetur në popullaritetin e tij të qëndrueshëm për të fituar një mandat të dytë. Qeveria preferon të presë deri në tetor 2023 kur përfundon mandati aktual parlamentar, në mënyrë që të ketë kohë të punojë për rimëkëmbjen e ekonomisë.
Gjatë natës, mijëra mbështetës të Khanit u mblodhën në vendin e sulmit, shumë prej të cilëve mbanin pankarta me slogane politike. Ministrja e Informacionit Marium Aurangzeb njoftoi dje se një sulmues ishte arrestuar, ndërsa në internet u postua një video në të cilën burri shpjegon aktin e tij.
“E bëra sepse Khan po mashtron qytetarët. U përpoqa ta vrisja, bëra gjithçka që munda”, thotë atentatori që duket se ndodhet brenda një komisariati. Ai shtoi se ishte zemëruar nga zhurma që vinte nga autokolona gjatë ezanit. Ndërkohë vetë Khan njihet si njeri tejet fetar.
Mbështetje e madhe
Shumë vrasje politike kanë dëmtuar historinë e fundit të Pakistanit, duke përfshirë atë të Benazir Bhutto-s në vitin 2007, gruaja e parë që sundoi një vend mysliman në kohët moderne. Autorët e vrasjes së saj nuk janë identifikuar.
Pavarësisht largimit të tij nga kryeministria, Khan gëzon mbështetje të madhe nga pakistanezët. Që nga prilli, ai ka organizuar mitingje të mëdha në të gjithë vendin, ku marrin pjesë dhjetëra mijëra mbështetës të tij, me qëllim që të ushtrojë presion mbi koalicionin e brishtë qeverisës.
Ai vazhdon të pretendojë se rënia e tij është rezultat i një “komploti” të SHBA-së dhe ka kritikuar vazhdimisht qeverinë e Shehbaz Sharif, si dhe strukturën ushtarake. /tesheshi.com/
