Blendi Gashi
(Mos)formimi i ushtrisë së Kosovës ka përplasur keq partinë opozitare LDK-në me dy partitë në pushtet, PDK-në e AAK-në. Kjo pasi dy të fundit akuzuan partinë e Isa Mustafës se në vitin 2014 ka qenë ajo fajtore për mostransformimin e FSK-së në Forca të Armatosura, për shkak se ishin kundër vazhdimit të vendeve të rezervuara për partitë e minoritetit serb.
E gjitha nisi pasi shefi i grupit parlamentar të LDK-së, Avdulla Hoti kritikoi punën e qeverisë “Haradinaj” duke i përmendur mosformimin e ushtrisë e mosliberalizimin e vizave. Por kryeministrit Ramush Haradinaj iu kundërpërgjigj Hotit duke fajësuar LDK-në se ka lënë vendin pa ushtri.
“Sa i përket ushtrisë, është LDK-ja ajo që e ka lënë Kosovën pa ushtri. Në ambasadën amerikane kur ishim me Thaçin, Pacollin… na kanë ofru 2014 për me bo ushtrinë. LDK ka dasht mu bo patriote atëherë. Na kanë qujt tradhtarë. Për 4 vjet na kanë lanë. Pyeti amerikanët dhe i gjeni transkriptet. E keni lënë Kosovën pa ushtri qe 10 vjet, turp duhet me ju ardhë. Nuk jau kisha thënë t’ishi kanë më të kujdesshëm. LDK ka dashtë me e marrë 1 për qind të votave më shumë. Refuzuan me i jep një vend minoriteteve. Kanë shitë patriotizëm”, deklaroi Haradinaj.
Atë që e tha Haradinaj e konfirmoi edhe zv.kryeministri Enver Hoxhaj nga PDK i cili tha se shansi për ta formuar ushtrinë është humbur për shkak të mospërkrahjes së vazhdimit edhe për një mandat të vendeve të rezervuara për minoritetin serb, që në atë kohë i takonte partisë së Sllobodan Petroviçit
Reagon ashpër LDK-ja: e pavërtetë deklarata e Ramushit
Ndaj akuzave të kryeministrit reaguan ashpër deputet të LDK-së që ishin në takimet mes Ambasadës Amerikane e krerëve kosovarë për formimin e ushtrisë, duke thënë se Haradinaj dha deklarata të pavërteta. I pari reagoi deputeti i LDK-së, Arben Gashi.
“Na të njohim për burrë të fortë e trim po as na nuk jemi të ligë. Kur është diskutu çështja e diskutimit të ushtrisë kam qenë prezent dhe çka po flitet këtu është e pasaktë. Unë të këshilloj ndaq dukagjinase ndaq kosovare mos përdor kësi fjalori”, tha Gashi.
Haradinaj pastaj e mori fjalën dhe i kërkoi falje Gashit, ndërsa tha se ajo që deklaroi për themelimin e ushtrisë ishte e vërtetë dhe se shumë njerëz mund ta vërtetojnë.
“Arben, ke të drejtë. Nuk është dashtë me përdorë aso shprehje. Kërkoj falje. Ka plot njerëz këtu që janë kanë aty, që është ofru me ba ushtrinë e Kosovës”, tha Haradinaj.
Më pas reagoi edhe deputeti tjetër LDK-së, Ismet Beqiri, i cili tha se nuk ka pas ofertë për këmbim të vazhdimit të mandateve të deputetëve serbë në rast të krijimit të ushtrisë së Kosovës, ndërsa tregoi se çfarë ka ndodhur në takiminin e krerëve të shtetit me ambasadën e SHBA-së.
“Ne jemi subjekt serioz nëse diçka na kanë dhënë. Takimin me ambasadoren Jacobson ka qenë z.Thaci, Haradinaj, Jakup Krasniqi, Pacolli, z. Isa Mustafa dhe unë si kryetar i grupit. Nëse ekziston një dokument i tillë ne bartim përgjegjësi. Asnjëherë nuk na është bërë një ofertë që mi votu vazhdimin e mandatave dhe ne me votu. Jakup Krasniqi ishte ai që e ka kundërshtu”, tha Beqiri.
Reagim më të ashpër se dy bashkëpartiakët bëri deputetja Vjosa Osmani i cili tha se vetëm LDK-ja e ka seriozitet krijimin e ushtrisë, ndërsa akuzoi Haradinaj se nuk e tha të vërtetën.
“Gënjeshtrat nuk munden me qu asnjë proces përpara , deri tash është dëshmuar që vetëm LDK-ja e ka me seriozitet krijimin e ushtrisë. Në asnjë moment nuk ka pasur garancë se nëse vazhdohen vendet e rezervuara, votohet ushtria. Ky ka qenë një kurth. Jeni në gjendje që të rrezikoni miqësitë esenciale dhe ekzistenciale vetëm për me shpëtu lëkurën tuaj. Deri këtu jeni gjendje me shku tani na shitni moral ne, po cila është kultura politike kur LDK-ja ishte në pozitë. Ishte kultur e gazit lotësjellës dhe sot kryeministri vjen e ankohet sa duhet”, tha Osmani, duke shtuar se për partinë saj është ushtruar gjithmonë urrejtje.
Për themelimin e ushtrisë së Kosovës ka folur së fundi edhe presidenti serb, Aleksandër Vuçiç. Ai është shprehur edhe njëherë kategorikisht kundër, duke thënë se një gjë e tillë nuk lejohet sipas marrëveshjes së Kumanovës. Ai ka deklaruar se me “Rezolutën 1244, vetëm Serbia dhe KFOR-i mund të kenë trupa ushtarake në Kosovë”. /tesheshi.com/
