Ylli i “Marvel Cinematic Universe”, Sebastian Stan, do të portretizojë Donald Trumpin kontrovers në filmin e ardhshëm biografik “The Apprentice”, shkruan Deadline.
Filmi është drejtuar nga regjisori iranian Ali Abbasi, krijuesi i filmit fitues të çmimeve “Holy Spider”, i cili ka punuar në serialin e njohur të HBO, “The Last of Us”.
Krahas Stanit, në film luajnë Maria Bakalova, e cila do të luajë ish-bashkëshorten e Trump, Ivana Trump, dhe Jeremy Strong, i cili do të luajë rolin e avokatit Roy Cohn.
Deadline e përshkruan filmin si “një eksplorim i fuqisë dhe ambicjeve të vendosura në një botë korrupsioni dhe mashtrimi”.
Filmi do të ndjekë ngritjen e Trump në vitet ’70 dhe ’80, kur ai filloi të ndërtonte perandorinë e tij të pasurive të paluajtshme në New York dhe marrëdhënien e tij me avokatin famëkeq Roy Cohn.
Skenari për filmin është shkruar nga Gabriel Sherman, bestselleri i të cilit “The Loudest Voice in the Room” ishte frymëzimi për mini-serialin “The Loudest Voice”, me Russell Crowe në rolin e ish-shefit të Fox News, Roger Ailes.
Stan fitoi zemrat e fansave me rolin e tij si Bucky Barnes në “Marvel Cinematic Universe”, ndërsa mahniti kritikët me performancën e tij në serialin “Pam & Tommy”. Por opinionet janë të ndara për rolin e tij të ri.
“E neveritshme, Sebastian duhet të ketë turp”, “Nëse kjo nuk është satirë, nuk dua ta shikoj filmin”, “Kjo është hera e dytë që Sebastian Stan luan një agjent rus të gjumit”, “Kjo tingëllon si një ide e keqe ”, kanë shkruar disa fansa të aktorit të njohur.
Por të tjerët ishin më pozitivë sepse besojnë se filmi do ta portretizojë Trumpin në një dritë të keqe.
“Sebastian Stan vazhdon të marrë disa nga vendimet më të guximshme, por më konfuze”, “Kjo është ose ideja më e mirë ose më e keqe ndonjëherë”, “Lëvizja e guximshme por e rrezikshme… Fat të mirë të gjithëve, do t’u duhet”, janë vetëm disa nga komentet në rrjetet sociale. /tesheshi.com/
