Edi Rama nuk e ka marrë ende vendimin nëse do të kërkojë një mandat të katërt si Kryeministër i Shqipërisë.
Të gjithë e pohojnë se ai e ka të sigurt dhe një mandat të katërt, por vetë Rama mendon ndryshe.
Në një podcast-in “Inside Albania” të gazetares Alice Taylor, ai pati këtë përgjigje:
“Kurrë nuk kam menduar për mandatin e radhës, mendoj vetëm për atë që duhet të bëj në mandatin aktual. Nuk i marr këto vendime paraprakisht, sepse jeta më ka mësuar, herë me të keq e herë me zemërgjerësi, që është më mirë të kesh një vizion dhe destinacion, por të planifikosh dhe të punosh hap pas hapi. Nuk i dihet kurrë me këto gjëra që po ndodhin. Por edhe pa ndodhur diçka, sërish nuk i dihet”.
I pyetur nëse synon politikën jashtë vendit pasi të mbarojë mandatin e tretë si kryeministër, referuar një emri që ka bërë në zhvillimet ndërkombëtare – rasti i fundit në Këshillin e Sigurimit në replikë me rusët, Rama tha:
“Fakti që komentet ndaj delegacionit rus në OKB u bënë virale ishte çështje fati. Tema ishte shumë e rëndësishme për të gjithë. Kurrë nuk do kishte dalë Shqipëria në të gjitha mediat botërore në një tjetër mënyrë. Ishte fantastike për vendin, për emrin e Shqipërisë”.
Por ç’do të ndodhë me të pasi të lërë politikën, ç’jetë të tretë do ketë?
“Dua të jem versioni i tretë i Edi Ramës. Dikur isha sportist dhe artist. Versioni i tretë do të jetë diçka krejt tjetër. I kam disa ide, por nuk do të jetë politika, asgjë e ngjashme me këtë. Mendoj se është koha. Uroj dhe shpresoj të kem kohë të bëj sërish diçka që do të përfshijë njerëzit, por tërësisht ndryshe nga ky profil”. /tesheshi.com/
