Bordi qendror i LSDM-së pranoi dorëheqjen e Zoran Zaevit si kryetar i partisë dhe filloi procesin e zgjedhjes së liderit të ri, tha zëdhënësja e partisë në pushtet, Bogdanka Kuzeska.
Në një konferencë për media, gjysmë ore pas mesnate, ajo tha se “Bordi Qendror i LSDM-së deklaroi se dorëheqja e Zaevit është e nevojshme që të fillojnë zgjedhjet brenda partisë”.
Kuzeska shtoi se Bordi Qendror i LSDM-së ka vendosur që zgjedhjet të mbahen më 12 dhjetor. Dorëzimi i kandidaturave nis sot dhe do të zgjasë shtatë ditë.
Bordi Qendror mori vendim për shpalljen dhe zhvillimin e zgjedhjeve të drejtpërdrejta brendapartiake për kryetarin e ri të partisë, të udhëhequr nga Zaev që nga viti 2013.
Zëdhënësja e LSDM-së tha se Zaev në seancat e Bordit Ekzekutiv dhe Qendror ka informuar se shumica parlamentare është stabile, se aktualisht ka 61 deputetë në Kuvendin prej 120 vendesh dhe se pret që mundësitë të shtohen edhe më shumë.
Ai mbetet një anëtar aktiv i partisë
“Është e rëndësishme për ruajtjen e rrugës evropiane të shtetit dhe për shkak të sfidave që janë para qytetarëve në periudhën e ardhshme. Bordi Qendror i LSDM-së vlerëson se ka hapësirë për negociata për përfshirjen e Alternativës në shumicën qeverisëse në bazë të parimeve të vlerave dhe programeve”, tha Kuzeska.
E pyetur se cili do të jetë roli i Zaevit në LSDM pas 12 dhjetorit, ajo tha se ai do të jetë një “anëtar aktiv i partisë”.
Më 31 tetor, Zaev dha dorëheqje verbale si kryeministër i Maqedonisë së Veriut dhe lider i LSDM-së për shkak të rezultateve të dobëta në zgjedhjet lokale, por organet e partisë vendosën më 9 nëntor që të shtyjnë dorëheqjet për një kohë të pacaktuar.
Arsyeja e asaj shtyrjeje, siç u shpjegua në atë kohë, ishte për të forcuar shumicën e lëkundur parlamentare dhe për të mos humbur rastin që vendi të nisë negociatat me BE-në në dhjetor.
Pas përpjekjes së dështuar të opozitës së udhëhequr nga VMRO-DPMNE për rrëzimin e qeverisë në Kuvend më 11 nëntor, Zaev filloi negociatat me parti të caktuara opozitare, duke përfshirë edhe Alternativën Shqiptare me katër deputetë, për të forcuar shumicën parlamentare. /tesheshi.com/
