Mimoza Kusari-Lila e cila drejton komunën e Gjakovës ka kujtuar luftën e Kosovës dhe tmerrin që shqiptarët e kanë përjetuar teksa tentonin të iknin nga dhuna serbe. Ajo rikujton këto skena duke aluduar tek rasti i fundit të sjelljeve të policëve maqedonas kundrejt emigrantëve sirianë, pamje këto që paraqesin një realitet tmerrues.
“Ende i kemi të freskëta pamjet e ushtarëve maqedonas që shtynin dhe goditnin shqiptarët e Tetovës dhe Gostivarit me kondak të pushkës, vetëm se ata ndanin bukë për shqiptarët e Kosovës të cilët kishin ikur nga dhuna serbe, vetëm për të arritur në Bllacë dhe për t’u ballafaquar me një tjetër dhunë në Mars të 1999-tës”, ka shkruar ajo në Facebook.
Më tej, Kusari-Lila shkruan se atëbotë, u desh intervenimi i bashkësisë ndërkombëtare që të mund të largoheshin shqiptarët nga balta e Bllacës dhe të transferoheshin nëpër kampet brenda territorit të Maqedonisë. Ajo shton se edhe në kampe ishte ushtria maqedone ajo që ruante përtej rrethojave, për të mos i lënë shqiptarët etnikë të dalin nëpër Maqedoni nga frika se prishej balanca etnike e shtetit.
“Maqedonët janë mësuar të tregtojnë/përfitojnë nga refugjatët. Llastimi i shtetit nga bashkësia ndërkombëtare atëbotë për të bindur të bëjnë minimumin për refugjatët nga Kosova, nuk e ndihmoi aspak demokratizimin e tij. Në të kundërtën, tregoi se pas 16 viteve është po ai shtet i pashpirt, i pashpresë vetë”, thekson Kusari-Lila.
Kusari-Lila thotë së refugjatët sirianë sot, kanë ikur nga vdekja dhe represioni brutal dhe një shtet i cili nuk e kupton vlerën minimale të jetës që duhet shpëtuar, nuk e di a e meriton shtetësinë.
“Si refugjate dikur, e dij se nuk ka ndjenjë më të trishtë dhe nuk ka nënçmim dhe dëshpërim më të madh se ndjenja e pashpresë e refugjatit”, shkruan ajo, “por, edhe nuk ka poshtërsi më të madhe se sjellja e dhunshme e autoriteteve maqedone ndaj shqiptarëve dikur dhe sirianëve sot”.
Kusari-Lila thotë se Bashkimi Evropian duhej të reagojë sot se nesër mund të jetë vonë dhe
në fund ajo bën thirrje se nuk duhet lutur qeveria maqedone për të ndihmuar sirianët, duhet penalizuar nëse nuk e bën një gjë të tillë./tesheshi.com/
