Kryeministri i Kosovës Albin Kurti tha të martën se zgjedhjet në katër komuna në veri të Kosovës do të mbahen më 23 prill dhe shtoi se nuk ka informacione për destabilizim në atë pjesë të vendit.
“Ne mbajmë takime me institucionet ndërkombëtare të sigurisë dhe bëjmë përgatitjet e nevojshme në mënyrë që çdo gjë të shkojë pa probleme, drejt dhe në mënyrë demokratike. Nuk kemi informacion për destabilizimin. Kemi ndarë të dhëna dhe analiza me njëri-tjetrin. OSBE-ja është për bashkëpunim dhe siguri, por nuk kemi arsye të besojmë se do të ketë pengesa të dielën”, tha ai.
Ai theksoi se zgjedhjet do të jenë paqësore dhe demokratike dhe shtoi se institucionet e Kosovës janë duke bërë përgatitjet përfundimtare për organizimin e tyre, për të cilat nuk ka asnjë pengesë përveç frikësimit mediatik të serbëve me propagandë nga media të afërta me pushtetin në Beograd, transmeton Tanjug.
Këtë e ka deklaruar Kurti pas vënies së gurthemelit për ndërtesën e Agjencisë Kadastrës së Kosovës dhe ka kërkuar edhe një herë zbatimin e plotë dhe të menjëhershëm të marrëveshjes ndërmjet Serbisë dhe Kosovës për normalizimin e marrëdhënieve.
Kryeministri i Kosovës i bëri thirrje Bashkimit Evropian që ta detyrojë Serbinë të zbatojë marrëveshjen e arritur në Bruksel më 27 shkurt dhe aneksin zbatues të saj të rënë dakord më 18 mars në Ohër të Maqedonisë së Veriut.
Më 23 prill, në Kosovë duhet të mbahen zgjedhjet e jashtëzakonshme për kryetarët e komunave të Mitrovicës, Zveçanit, Zubin Potokut dhe Leposaviqit.
Vendimi për zgjedhjet është marrë pasi kryetarët e atyre komunave së bashku me serbët e tjerë nga Kosova dhanë dorëheqje vitin e kaluar, në shenjë kundërshtimi ndaj vendimit të Qeverisë së Kosovës për të filluar procesin e riregjistrimit të automjeteve me tarka KS. /tesheshi.com/
