Kryeministri Albin Kurti ceku problemin e ikjeve nga Kosova, duke thënë se një pjesë e mirë e të rinjve që vendosin të emigrojnë nuk gjejnë punë në profesionet e tyre në bazë të arsimimit që kanë.
“Përveç papunësisë që është problem i madh në Kosovë është shumë problem i madh edhe pamundësia e punësimit në profesion. Një numër i konsiderueshëm i të rinjve tanë që po migrojnë nuk është që po migrojnë se s’kanë vend pune, por s’kanë vend pune në profesionin e tyre. Pasi kur të mbarosh fakultetin juridik ose ekonomik nuk mund të punosh kamerierë gjithë jetën.
Ajo çka është themelore që ne të bëjmë si reformë të përbashkët është kjo lidhja e tregut të punës dhe arsimimin profesional. Numri më i madh i atyre që po e lëshojnë Kosovën është se nuk gjejnë punë në profesionin e tyre”, tha i pari i qeverisjes në Kosovë.
Nga ana tjetër, Kurti tha se qeveria e Kosovës e sheh mërgatën jo vetëm si kapital material por edhe si kapital njerëzor që mund të investojë në vend me kapital dhe me dije njerëzore.
“Studimet tregojnë që 43 për qind të shtëpive në Kosovë kanë së paku një anëtar të familjes që jeton në diasporë. Ndërsa, remitancat e dërguara brenda një viti nga qytetarët që jetojnë jashtë janë në vlerë mbi 1,4 milion dollar, gjë që dëshmon se diaspora luan një rol kyç edhe në zhvillimin e vendit. Prandaj pjesë integrale e fuqishme e planit tonë për zhvillim të fuqishëm ekonomik është pikërisht mërgata jonë”, tha Kurti.
Kurti tha se Qeveria po punon që diasporën ta angazhojë në disa mënyra, ku mund të kontribuojë në krijimin e ndërmarrjeve, lidhjet tregtare, si dhe ndarjen e përvojave që ndikojnë në rritjen e potencialit të Kosovës. /tesheshi.com/
