Lideri i Lëvizjes Vetëvendosje, Albin Kurti, thotë se ratifikimi i Demarkacionit me Malin e zi është legjitimim i tradhtisë së Hashim Thaçit dhe kjo marrëveshje e ratifikuar, sipas tij të premten do të shkojë në Bruksel për të vazhduar marrëveshjen me “Zajednicën”.
“Ky regjim dëshiron t’i thotë Malit të Zi, Serbisë dhe ndërkombëtarëve se Isa Mustafa nuk ua kryen ‘Demarkacionin’, është Ramush Haradinaj ai që fal tokë të Kosovës; dhe, Isa Mustafa nuk ua kryen ‘Zajednicën’, është Hashim Thaçi ai që fal shtet të Kosovës”, shkruan Kurti në Facebook.
Ai më tej shkruan se të gjithë janë bërë bashkë në dëmtimin e Kosovës.
“Janë secili të ndarë në garën e efikasitetit për dëmtimin e Kosovës. Serviliteti ndaj burokratëve ndërkombëtarë është bërë servilitet ndaj fqinjëve hegjemonë. Sepse, stabiliteti (në kurriz të drejtësisë) në Kosovë është veçse në funksion të stabilitetit rajonal (në kurriz të Kosovës)”, shkruan Kurti.
Kryevetëvendosësi më tej thotë se qytetarëve ua premtojnë heqjen e vizave pikërisht “kriminelët që nuk duan të hiqen nga pushteti në Kosovë, e të cilëve u mbetet edhe një kusht i BE-së mandej: ta luftojnë vetveten”. /tesheshi.com/
