Kryeministri i Kosovës, Albin Kurti tha se institucionet e sigurisë dhe inteligjencës së Kosovës po hetojnë rritjen e rrezikut të sulmeve të dhunshme dhe u bëri thirrje të gjithë qytetarëve, veçanërisht serbëve, të jenë të kujdesshëm dhe të përmbahen nga dhuna e inskenuar dhe keqdashëse.
Ai në fillim të seancës së qeverisë së Kosovës tha se shumë gjëra ndryshojnë nga “sulmi paraushtarak, terrorist dhe kriminal” i 24 shtatorit në Banjskë.
Ai ka theksuar se çdo gjë do të ishte ndryshe nëse në aktin e parë nuk do të neutralizoheshin grupi “terrorist” dhe planet e tyre për të aneksuar katër komuna në veri të Kosovës.
“Beogradi dështoi përsëri”
“Institucionet tona të sigurisë dhe të inteligjencës së fundmi kanë hetuar rrezikun e shtuar të organizimit të sulmeve të dhunshme nga grupet e strukturave kriminale serbe në Kosovë. Qëllimi i tyre kryesor është të fajësojnë policinë e Kosovës dhe ta paraqesin atë si forcë shtypëse ndaj serbëve të Kosovës”, tha Kurti.
Ai ka theksuar se janë inkurajuar nga përkrahja që kanë marrë nga shteti i Serbisë, duke i trajtuar në njërën anë si heronj dhe luftëtarë të rënë, dhe në anën tjetër duke intensifikuar aktivitetet e ushtrisë përgjatë kufirit me Kosovën.
“Ata u përpoqën të ndryshojnë realitetin në terren me veprime të organizuara dhe të koordinuara paraushtarake. Ata dështuan. Ata abuzuan me manastirin e Banjskës, me qëllim që t’i jepnin ngjyrë fetare ngjarjeve të 24 shtatorit. Ata dështuan përsëri. Tani, formacionet kriminale të sponsorizuara nga fqinji ynë verior, në skenarët e tyre destabilizues, ka shumë të ngjarë të keqpërdorin dallimet etnike për qëllime politike”, tha Kurti.
Ai vlerësoi se lirimi i Milan Radojiçiçit, më pak se 24 orë pas arrestimit të tij, paraqet “dëshmi dhe sinjal të potencialit për rigrupim dhe hakmarrje, sepse më 24 shtator dështoi Beogradi zyrtar dhe ushtarak”.
“Shteti ligjor, shoqëria demokratike”
Ai shtoi se 23 vjet pas përmbysjes së Sllobodon Millosheviçit, regjimi aktual serb asnjëherë nuk i ka ngjarë kaq shumë Serbisë së Millosheviçit, për nga pikëpamjet, qëllimet, sjelljet, metodat dhe veprimet.
“Prandaj ju bëj thirrje juve, veçanërisht juve bashkëqytetarë serbë, të jeni të kujdesshëm dhe të përmbaheni nga dhuna e inskenuar dhe keqdashëse në ditët, javët dhe muajt në vijim. Në Kosovë të gjithë jemi qytetarë të barabartë, sepse shteti është legal dhe shoqëria demokratike. Nuk ka komunitete të padëshirueshme. Shqiptarët, serbët, boshnjakët, turqit, ashkalitë, romët, egjiptianët, goranët dhe të gjithë të tjerët jetojnë dhe punojnë së bashku kudo në Kosovën tonë të dashur, paqësore dhe pro-evropiane”, tha Kurti.
Ai u bëri thirrje qytetarëve që të mbështeten në policinë e Kosovës, të raportojnë sjellje të dyshimta nga persona të panjohur dhe të mos bien në raporte të pakonfirmuara dhe dezinformata. /tesheshi.com/
