Kryeministri Albin Kurti sqaroi dhe njëherë të dërguarin Lajçak në lidhje me Asosacionin e Komunave Serbe, për të cilën diplomati i Brukselit tha se Kosova nuk duhet të ketë frikë të zbatojë, pasi sipas tij nuk do jetë një Republika Srpska.
“Kosova nuk frikësohet, por Kosova me qeverinë e përgjegjshme është e kujdesshme. Ne ju shërbejmë qytetarëve të Republikës dhe mbrojmë interesat e vendit tonë”, e nis Kurti një reagim të tij, duke vijuar më pas:
“Interesi i shtetit të pavarur i republikës sonë demokratike e sovrane, është integriteti territorial, është funksionaliteti shtetëror, është kushtetutshmëria dhe ligjshmëria. Ne kemi dhënë propozimet tona në takimet që kemi pasur në Bruksel dhe jemi konstruktiv për bisedimet e ardhshme në dialogun që zhvillohet, i lehtësuar apo ndërmjetësuar nga Bashkimi Evropian. Me ç’rast parimi i reciprocitetit është parim i shëndoshë i marrëdhënieve të mira fqinjësore.
Marrëveshja duhet të arrihet. Jemi të gatshëm të punojmë për këtë dhe kur bisedojmë për marrëveshje bisedojmë për marrëveshje, nuk bëjmë dialog për dialog, jemi konstruktiv, jemi serioz dhe njëkohësisht e vëmë theksin tek ajo që po pajtohen gjithnjë më shumë që të gjithë faktorët ndërkombëtarë që e ka thënë në mënyrë shumë të qartë presidentit i SHBA-së, Joe Biden, që marrëveshja për normalizimin e plotë ndërmjet Kosovës dhe Serbisë duhet ta ketë në qendër njohjen reciproke”, tha Kurti.
Pra, sipas të parit të qeverisë së Kosovës, një Asosacion që nuk çon në njohje, nuk ka asnjë vlerë. /tesheshi.com/
