Kurti shpartallon Vuçiçin në Këshillin e Sigurimit

Në Këshillin e Sigurimit të Kombeve të Bashkuara (OKB) me kërkesë të Serbisë po mbahet një mbledhje urgjente, ku Vuçiç dhe kryeministri i Kosovës, Albin Kurti i janë drejtuar njëri-tjetrit.

Aleksandar Vuçiç e filloi fjalimin e tij me pretendimin se autoritetet e Kosovës “vazhdojnë sulmet ndaj popullatës jokosovare”, me theks të veçantë në “sulmet ndaj popullatës serbe në Kosovë”.

Kujtojm se seanca erdhi pas kërkesës së tij për shkak të vendimit të autoriteteve të Kosovës për ta bërë euron valutë të vetme në territorin e Kosovës, duke hequr praktikisht dinarin.

Por në përgjigje të prezantimit të Vuçiçit, Kurti e filloi fjalimin e tij me një fjali goditëse.

“Është e vështirë të dëgjosh dhe ka ironi të thellë në akuzat e rreme për shkelje të të drejtave të njeriut nga një vend që kreu gjenocidin e fundit në shekullin e 20-të dhe një qeveri që është një nga kërcënimet më të mëdha autoritare për paqen dhe sigurinë rajonale,” tha kryeministër i Kosovës.

Ai përmendi brutalitetin e krimeve të kryera në territorin e ish-Jugosllavisë gjatë luftërave të viteve 1990, me theks të veçantë në Bosnjë dhe Kosovë.

Gjithashtu, Kurti theksoi se Vuçiç ishte pjesë e regjimit të Sllobodan Millosheviçit, ish-presidentit të Serbisë, i cili vdiq para se të jepej vendimi për përgjegjësinë e tij për krimet e luftës të kryera në territorin e ish-Jugosllavisë. /tesheshi.com/