Deputeti i Vetëvendosje-s, Albin Kurti, nuk e ka pritur aspak mirë deklaratën e kryeministrit Edi Rama drejtuar homologut të tij Haradinaj se duhet të ndryshojë qëndrim ndaj Demarkacionit me Malin e Zi.
Kurti kërkesën e Ramës e quan të padrejtë pasi thotë se hartat dëshmojnë se Kosova humb 8200 hektarë.
Vetëvendosësi Kurti përmes një shkrimi në Facebook thotë se pret nga Rama të merret me realizimin e marrëveshjeve Shqipëri-Kosovë dhe të kontribuojë në lartësimin e social-demokracisë e të bashkimit të kombit, ndërsa ja bën me dije se Kosova nuk ka kohë për të humbur e as tokë për të falur.
“Rama pra po kërkon që, kundër asaj që dëshmohet në harta, në dokumente zyrtare, nga profesionistët ekspertë, në mbamendje institucionale, në kujtesë popullore dhe me peticionin masiv qytetar, të përkrahet një marrëveshje e padrejtë që ia heq Kosovës 8.200 ha. të territorit. Me 32 deputetët e saj tash Lëvizja Vetëvendosje është partia më e madhe në vend e në Kuvend. Në mënyrën më meritore ne do të merremi me Marrëveshjen e Demarkacionit Kosovë-Mal i Zi”, shkruan Kurti.
Kurti ndërkaq ka shprehur brengën për mos zbatimin e marrëveshjeve të nënshkruara nga dy qeveritë vitin e kaluar. Sipas tij përparimet në këtë aspekt janë tepër të ngadalta, më shpesh ceremoniale se sa përmbajtjesore.
Kujtojmë se Rama dhe Kurti kanë kultivuar raporte të mira duke mos kursyer as lëvdatat për njëri-tjetrin. Mbetet të shihet nëse raportet e tyre mund të rrënohen për shkak të dallimeve që kanë për Demarkacionin. /tesheshi.com/
