Përparimi në negociatat për normalizimin e marrëdhënieve ndërmjet Serbisë dhe Kosovës nuk ishte i mundur sepse të dyja palët vendosën parakushte që ishin të papranueshme për palën tjetër, tha përfaqësuesi i lartë i BE-së për politikë të jashtme dhe të sigurisë, Josep Borrell.
“Për fat të keq, marrëveshja nuk ishte e mundur për shkak të parakushteve që secila palë vendosi, të cilat ishin të papranueshme për palën tjetër”, tha Borrell të enjten në mbrëmje.
Të enjten, Vuçiç dhe Kurti biseduan ndaras për orë të tëra në Bruksel në prag të samitit të BE-së me liderët e Gjermanisë, Francës dhe Italisë, Olaf Scholz, Emmanuel Macron dhe Giorgia Meloni, si dhe me Presidentin e Këshillit Evropian, Charles Michel. Ishin aty dhe përfaqësuesi i Lartë i BE-së për Politikën e Jashtme dhe Sigurinë Josep Borrell dhe i dërguari special për Ballkanin Perëndimor, Miroslav Lajçak.
Borrell tha se krijimi i komuniteteve me shumicë serbe është një pengesë e madhe për normalizimin e marrëdhënieve.
“Për t’i ndihmuar të dyja palët në arritjen e një marrëveshjeje, ne të gjithë së bashku u propozuam atyre një model evropian, serioz dhe të balancuar për krijimin e një komuniteti të komunave me shumicë serbe dhe insistuam që ta shfrytëzojnë këtë mundësi, e cila do të ishte një përmirësim i madh në procesin e normalizimit dhe për të shmangur incidentet”, tha Borrell.
Ai shtoi se BE-ja do të vazhdojë të insistojë në vazhdimin e dialogut për normalizim, i cili është e vetmja mënyrë për të dyja palët të përparojnë në rrugën evropiane.
Kryeministri i Kosovës Albin Kurti shprehu gatishmërinë për të nënshkruar marrëveshjen për rrugën drejt normalizimit dhe aneksin e zbatimit të saj të enjten në Bruksel, por pretendon se presidenti serb Aleksandar Vuçiç ka refuzuar.
“Republika e Kosovës ka pranuar marrëveshjen bazë të propozuar nga Bashkimi Evropian më 27 shkurt 2023 dhe aneksin për zbatimin e saj nga 18 mars 2023 në Ohër”, ka thënë Kurti në një deklaratë pas një sërë bisedimesh që kanë zgjatur gjithë pasditen.
Por Vuçiç u tha gazetarëve se nuk është e vërtetë që ai ka refuzuar të nënshkruajë, sepse nuk është diskutuar për këtë.
“Këto janë marifete të autoriteteve të Prishtinës, të cilët ua bëjnë me dije mediave të tyre se Vuçiç ka refuzuar, pasi nuk bëhet fjalë për nënshkrim, por për zbatimin e asaj që është nënshkruar dhe për të cilën është rënë dakord ndërkohë”, ka pohuar Vuçiç.
Ai shtoi se në ato takime nuk është biseduar për ndonjë nënshkrim, por për zbatimin e asaj që është nënshkruar më herët, ndër të tjera për marrëveshjen për formimin e komuniteteve të komunave me shumicë serbe nga viti 2013, e cila ende nuk është zbatuar.
“Serbia, në përputhje me politikën e saj, ka thënë qartë se dëshiron të zbatohen të gjitha marrëveshjet, nga ajo për formimin e bashkësisë së komunave me shumicë serbe nga viti 2013 e deri te ato që u arritën më vonë në Bruksel dhe Ohër”. ka thënë Vuçiç.
Vuçiç ka shtuar se gjithmonë ka theksuar se Serbia nuk mund ta pranojë anëtarësimin e Kosovës në OKB apo pavarësinë e Kosovës, por se është e gatshme të zbatojë gjithçka që është rënë dakord. Ai tha se propozimi i fundit evropian për statutin e bashkësisë së komunave me shumicë serbe paraqet bazë të mirë për vazhdimin e punës në të ardhmen. /tesheshi.com/
