Si shumë figura politike të botës shqiptare, edhe kryeminsitri Kurti është shprehur me ditirambe për figurën e Skënderbeut, por duke i shpëtuar diçka që bie në kundërthënie me atë çfarë është shprehur.
“555 vite më parë, vdiq Gjergj Kastrioti Skënderbeu, strategu i madh që për një çerekshekull i priu rezistencës kundër pushtimit osman në Arbëri, nga viti 1443 deri në vdekje më 1468.
Edhe gati gjashtë shekuj nga koha kur jetoi, Skënderbeu vazhdon të frymëzojë me historinë e tij. Skënderbeu ishte strategu ushtarak gjenial i cili me trupa ushtarake numerikisht të kufizuara, arriti t’u bënte ballë ushtrive të mëdha të forcës politike më të fuqishme të kohës, Perandorisë Osmane. Skënderbeu ishte politikani që arriti t’i bashkonte në Lezhë (1444) në një aleancë politike dhe ushtarake, dinastët e shumicës së fisnikërisë arbërore, pasi kishin rënë me radhë nën vasalitetin ose dominimin e osmanëve….”, janë disa nga frazat e Kurtit për figurën e heroit kombëtar shqiptar.
Por kur shkon te autorët që kanë shkruar për Skënderbeun, Kurti përmend atë që ka rrëzuar të gjithë atë çfarë kryeministri thotë e jo vetëm ai, por e gjitha politika apo historiografia shqiptare. Fjala është për historianin zviceran Oliver Jens Schmitt.
“Autorë e studiues të shumtë shkruan biografi dhe libra për Skënderbeun, përmes të cilave mund të njihet jeta dhe historia e tij, qysh nga nga niveli i regjistrimeve të bashkëkohësve si Marin Barleti dhe Dhimitër Frangu, deri te studimet bashkëkohore historiografike nga Aurel Plasari dhe Oliver Jens Schmitt në kohën tonë.
Lavdi heroit të shqiptarëve Gjergj Kastriotit Skënderbeut për jetë e mot!”, e përfundon mesazhin e tij Albin Kurti.
Tani, është e qartë se ai nuk e ka lexuar “Skënderbeun” e Schmitt-t dhe dikush, ndonjë këshilltar a qoftë dhe mik, duhet t’ja thotë se ai rrëzon të gjithë ato çfarë Kurti ka shkruar për heroin, pasi vepra Schmitt-t destrukton fillim e fund Skënderbeun e historiografisë shqiptare.
Për këtë arsye, kur doli monografia e historianit zviceran më shumë se 10 vite më parë, ai gati u mallkua nga elita shqiptare, deri në akuzën se ishte proserb, ngase provoi me fakte të dokumentuara se i ati i heroit nuk quhej Gjon por Ivan./tesheshi.com/
