Serbia thotë se nuk do të na njohë kurrë dhe se nuk do të njohë krimet e së kaluarës, e kjo e fundit na lëndon më shumë se të parën, thotë kryeministri i Kosovës.
Kryeministri i Kosovës, Albin Kurti, ka deklaruar se në dialogun me Serbinë, nën kujdesin e Brukselit, ka qenë konstruktiv dhe kreativ dhe se duhet një dialog parimor mes dy palëve të barabarta, me një marrëveshje të bazuar në njohjen reciproke.
Ai e tha këtë gjatë pjesëmarrjes në forumin GLOBSEC në Bratislavë, në një panel së bashku me presidentin malazez Milo Gjukanoviç, të dërguarin e Bashkimit Evropian për Ballkanin Perëndimor Miroslav Lajçak, të dërguarin britanik Stuart Peach dhe kryeministrin e Maqedonisë së Veriut, Dimitar Kovaçevski.
Kurti ka përsëritur aty edhe akuzat për gjenocid ndaj Serbisë.
“Për fat të keq, Serbia thotë se nuk do të na njohë kurrë dhe se nuk do të njohë krimet e së kaluarës dhe kjo e fundit na lëndon më shumë se e para”, tha ai.
Kurti ka thënë se përkundër mohimit të krimeve dhe gjenocidit nga Serbia, Kosova po përpiqet të arrijë marrëveshje me Lajçakun për targa, në bazë të reciprocitetit.
Kryeministri i Kosovës ka theksuar se beson se “Bashkimi Evropian është fati ynë”.
“Evropa është kontinenti ynë, Kosova është një histori suksesi dhe ne mezi presim përgjigjen pozitive të Këshillit të Evropës kur është fjala për aplikimin tonë për anëtarësim”, tha Kurti. /tesheshi.com/
