Kandidati i Vetëvendosje-s për kryeministër, Albin Kurti, gjatë tubimit zgjedhor në Viti u ka bërë thirrje qytetarëve të vendit t’i bashkohen partisë së tij pasi ka thënë me ta në qeverisje jeta e ndershme do jetë tejet e lehtë, e për të korruptuarit do jetë tejet e vështirë.
”Në Kosovë tashmë është bërë më lehtë të jetosh si hajn se ndershëm. Ata derisa nuk i dënojmë me votë nuk mund t’i dënojmë me ligj qeveria e Vetëvendosjes nuk do ndalet e zmbrapset para asnjë krimineli. Me Vetëvendosjen në qeverisje nuk forcohet pushteti por forcohet shteti”, ka thënë Kurti, para vitiasve.
Tutje, ai tha se nuk ka në këto zgjedhje as krah të luftës as krah të paqes, por një ndarje tjetër është më e saktë, ndarja në krahun materialist të luftës dhe në krahun idealist të luftës.
“18 vjet ky shtet e ka gënjyer popullin e tij se do t’ju gjej punë. Bashkohu me Vetëvendosjen t’iu themi jo atyre himni i të cilëve është ‘Rreth koalicionit të korruptuar’. Disa po hanë mish si ujqit. E të tjerët po ju thonë hani fleta të lakrës si lepujt, e mesatarja e qytetarëve sarma. Me qeverisjen e Vetëvendosjes nuk do kenë politikanë ujq për të trajtuar qytetarët si lepuj. Populli do jetë ujk, e këta politikanë të korruptuar do të ikin si lepuj”, tha Kurti. /tesheshi.com/
