Kryeministri i Kosovës, Albin Kurti, tha të enjten se janë marrë masat e duhura për mbajtjen e zgjedhjeve në katër komuna në veri të Kosovës më 23 prill dhe se ata që duan të pengojnë mbajtjen e zgjedhjeve “do të përballen me forcën e ligjit.”
Ai këtë e tha në Kuvendin e Kosovës, ku paralajmëroi për pengesa të mundshme për shkak të zgjedhjeve të ardhshme për kryetarë të katër komunave në veri të Kosovës.
“Në procesin zgjedhor, qeveria është në shërbim të Komisionit Qendror të Zgjedhjeve [të Kosovës] dhe ne u përgjigjemi kërkesave të tyre. Ne kemi marrë masat e duhura, kemi aktivizuar mekanizmat institucionalë dhe burimet e nevojshme për t’u përgatitur për zgjedhjet e ardhshme”, tha Kurti.
Ai theksoi se “ata që duan të pengojnë mbajtjen e zgjedhjeve do të përballen me forcën e ligjit”.
Ai ka shtuar se përmes Ministrisë së Financave të Kosovës janë ndarë mjete financiare për mbajtjen e zgjedhjeve lokale.
Zgjedhjet e planifikuara për 23 prill
“Ftoj qytetarët e veriut të Kosovës që të votojnë për kandidatët për kryetarë komunash. Është shumë e rëndësishme që të gjithë qytetarët të dalin për të votuar dhe ne jemi duke bërë të gjitha përgatitjet. Jemi të vetëdijshëm që zgjedhjet atje nuk janë të njëjta si në komunat ku shqiptarët janë shumicë, sepse pengesat e Serbisë janë më të mëdha, si në media, ashtu edhe në strukturat paralele të mbetura”, tha Kurti.
Sipas afateve zyrtare të përcaktuara nga Komisioni Qendror i Zgjedhjeve të Kosovës, fushata zgjedhore ka filluar më 4 prill dhe do të përfundojë më 21 prill.
Për zgjedhjet për kryetarë komunash, Komisioni Qendror i Zgjedhjeve ka certifikuar 11 kandidatë, ndërsa për zgjedhjet për dy kuvende komunale ka certifikuar më shumë se 60 kandidatë.
Lista Serbe nuk ka aplikuar për këto zgjedhje.
Aty duhet të zgjidhen Kryetarët e Mitrovicës, Zveçanit, Zubin Potokut dhe Leposaviqit, si dhe këshilltarët e kuvendit komunal të Zveçanit dhe Leposaviqit. /tesheshi.com/
