Kandidati i Lëvizjes Vetëvendosje për kryeministër Albin Kurti, thotë se nuk ka kuptim të formohet qeveria duke u varur nga Lista Serbe, sepse atëherë ekzekutivi do t’i kishte dy kryeqytete, Prishtinën dhe Beogradin.
Sipas tij, koalicioni PDK, AAK dhe Nisma do të dështojnë në përpjekjen e parë për formimin e qeverisë, kështu që Vetëvendosje do ta formojë qeverinë në rastin e dytë.
“T’i kemi 61 numra, ne deputetët shqiptarë dhe më pas pakicat jo serbe. Por, kurrsesi të jetë qeveria e varur prej tyre. Nuk mund të ketë qeveri të re nga regjimi i vjetër. Prandaj, ne jemi të bindur që i takon Lëvizjes Vetëvendosje që ta formojë qeverinë e re dhe këtë do ta bëjmë duke u takuar dhe duke biseduar, në radhë të parë me partitë e koalicionit LDK-AKR-Alternativa dhe Lëvizja për Drejtësi, por edhe deputetë individualë, të cilët janë nga koalicioni PAN.”, ka thënë Kurti në një intervistë për Radio “Evropa e Lirë”.
Kurti ka bërë të ditur se si të dihen emrat e deputetëve të ardhshëm do të nisin kontaktet me LDK-në dhe aleatët e saj për formimin e qeverisë dhe deputetët e caktuar të partive të “koalicionit të luftës”. /tesheshi.com/
