Qeveria “Kurti” u mblodh një ditë më parë në Prevallë të Prizrenit, ku gati 3 javë pas nisjes së ushtrimit të pushtetit, është hartuar draft-qeverisja, duke u veçuar me sektorë e pika.
“Tashmë kemi edhe një draft të programit qeverisës i cili ka 41 faqe e që derivon nga marrëveshja jonë e koalicionit.
Ky program qeverisës pasqyron orientimet e përgjithshme të qeverisë, qasjen dhe parimet, prioritetet dhe iniciativat si dhe vendimet që do të merren për të përmirësuar gjendjen në vend në të gjitha fushat e përgjegjësisë”, ka deklaruar Kurti.
“Do të kemi një qeveri e cila planifikon dhe analizon para se të ekzekutojë vendime e të realizojë punime, e cila promovon sundimin e ligjit, që redukton shpenzimet financiare, përmirëson menaxhimin e financave publike dhe menaxhimin e ndërmarrjeve publike, që modernizon administratën publike dhe rrit transparencën llogaridhënien”, ishte ajo çfarë Kurti karakterizoi frymën që do ketë qeverisja e tij e saponisur. /tesheshi.com/
