Kryeministri i Kosovës, Albin Kurti, i kërkoi homologut grek Kyriakos Mitsotakis, në Athinë që Greqia të njohë Kosovën
Sipas qeverisë së Kosovës, kryeministri Kurti deklaroi se Greqia dhe Kosova duhet të forcojnë marrëdhëniet e tyre të pavarura për shkak të një historie të gjatë të përbashkët, një qëllimi të përbashkët të paqes dhe sigurisë në Ballkan dhe një të ardhme të gjatë të përbashkët.
“Kosova dëshiron të ndërtojë mbi lidhjet ekzistuese historike midis dy kombeve dhe të përmirësojë marrëdhëniet me Greqinë, si një element i rëndësishëm për stabilitetin rajonal afatgjatë,” tha Kurti.
Kurti i kërkoi Greqisë të bashkohej me bllokun e vendeve që e kanë njohur Kosovën.
Ai falënderoi për mbështetjen dhe qëndrimin konstruktiv ndaj Kosovës, të cilin Greqia e ka treguar veçanërisht gjatë muajve të fundit, duke ofruar mbështetje në favor të liberalizimit të vizave për qytetarët e Kosovës dhe duke avokuar për anëtarësimin e Kosovës në organizatat ndërkombëtare.
Në takim, kryeministri Mitsotakis përsëriti angazhimin e Greqisë për promovimin dhe forcimin e mëtejshëm të bashkëpunimit midis dy vendeve në promovimin e perspektivës evropiane të Ballkanit Perëndimor. Gjatë takimit, ata diskutuan gjithashtu për rritjen e marrëdhënieve bilaterale ekonomike midis Kosovës dhe Greqisë.
Me ftesë të kryeministrit grek Mitsotakis, Kurti po merr pjesë në një tryezë të rrumbullakët me qeverinë greke në Athinë. Në këtë tryezë e rrumbullakët, e 25-ta me radhë, e organizuar nga qeveria greke dhe prestigjiozja britanike The Economist, marrin pjesë nga kryeministra dhe ministra të vendeve të ndryshme, zyrtarë qeveritarë, vendimmarrës, drejtues të korporatave dhe akademikë.
Me temën “Nga distancimi social te solidariteti shoqëror”, tryeza e rrumbullakët është një hapësirë për dialog mbi çështjet që përcaktojnë botën, bazuar në përvojat e vendeve që përballen me pandeminë COVID-19 dhe përpjekjet e përbashkëta për një shoqëri më të qëndrueshme dhe të barabartë. /tesheshi.com/
