Kryeministri i Kosovës Albin Kurti ka konfirmuar se masat ndëshkuese të Bashkimit Evropian i kanë shkaktuar dëm Kosovës.
Në një intervistë për RTV Slloveni, ai tha se është e vërtetë se nga këto sanksione dëmtohet kryesisht komuniteti i biznesit, por edhe “shërbimet civile të Kosovës”.
Kështu i është përgjigjur pyetjes se si i përgjigjet kritikave se Kosova do të humbasë deri në 500 milionë euro nga fondet evropiane IPA për shkak të “politikës së ashpër në veri të Kosovës”.
“Për shembull, Marrëveshja e Stabilizim-Asociimit është ngrirë, edhe pse ne kemi përmbushur 69 për qind të saj”, tha ai dhe shtoi se “kreditë dhe grantet, si dhe financimi nga fondet e BE-së janë në rrezik”.
“E gjithë kjo është ndërprerë. Prandaj heqja e këtyre masave ndaj Kosovës do të ishte një vendim vërtet i mirëpritur dhe i drejtë i BE-së”, ka vlerësuar Kurti.
Ai hodhi poshtë përgjegjësinë e Kosovës për përkeqësimin e situatës në veri të Kosovës, pasi atje, siç tha ai, “ne po luftojmë kundër ekstremistëve të dhunshëm që sulmuan ushtarët e KFOR-it, Policinë e Kosovës dhe gazetarët” dhe tha se atje duhet të funksionojë sundimi i ligjit gjithashtu.
“Është shumë e rëndësishme që ne t’i kemi të dyja: sundimin e ligjit, pa ekstremistë të dhunshëm dhe sigurinë dhe paqen në anën tjetër,” tha ai.
Ai tha se “serbët e Kosovës që jetojnë në jug të Ibrit në përgjithësi janë të integruar mirë” dhe se “ata përfitojnë nga kjo, ndërsa serbët në veri të Kosovës nuk jetojnë aq mirë sepse nuk janë të integruar”.
Ai akuzoi Beogradin zyrtar se po bën gjithçka për të penguar integrimin e serbëve në veri të Kosovës.
“Ajo dhunë nga Beogradi duhet të përfundojë dhe ne kemi nevojë për ndihmën e bashkësisë ndërkombëtare, veçanërisht të BE-së”, tha Kurti.
Ai foli edhe për zgjedhjet në katër komunat veriore të banuara kryesisht me serbë, që ishte një nga katër pikat e marrëveshjes ndërmjet Kosovës dhe BE-së për qetësimin e situatës në veri të Kosovës.
“Jam duke punuar shumë dhe duke përgatitur gjithçka për zgjedhjet që do të mbahen në vjeshtë”, tha Kurti. /tesheshi.com/
