Kryeministri i Kosovës, Albin Kurti, i ka dërguar një letër Përfaqësueses së Lartë për Politikë të Jashtme dhe Siguri të Bashkimit Evropian, Kaja Kallas, në të cilën ankohet për atë që ai e cilëson si shtypje sistematike që autoritetet serbe po bëjnë ndaj shqiptarëve në Medvegjë, Bujanoc dhe Preshevë, për të cilën kërkon reagim nga bashkësia ndërkombëtare.
Kurti, në një letër të postuar në Facebook, thekson se shqiptarët në këto komuna përballen me diskriminim politik, administrativ, ekonomik, kulturor dhe identitar dhe se rrezikohet siguria dhe ekzistenca e tyre.
Ai thotë se komuniteti serb në Kosovë gëzon të drejta dhe liri, ndërsa shqiptarët në Serbi përballen me çregjistrimin e adresave dhe “spastrimin etnik administrativ”.
Sipas Kurtit, më shumë se dhjetë për qind e shqiptarëve janë fshirë nga listat e votuesve, duke iu hequr kështu të drejtën e votës.
Papunësia e lartë tek shqiptarët
Ai gjithashtu thekson se papunësia në zonat ku jetojnë shqiptarët në Serbi sillet ndërmjet 30 dhe 70 për qind, që është shumë më e lartë se mesatarja e Serbisë prej 12 për qind.
“Përfaqësimi i shqiptarëve në institucione është jashtëzakonisht i ulët, vetëm dy shqiptarë nga më shumë se 1000 të punësuar në spitalin rajonal të Vranjës dhe vetëm 12 shqiptarë nga 2000 të punësuar komunalë në Medvegjë”, ka shkruar Kurti.
Ai dënon ngritjen e bazave ushtarake në Bujanoc dhe rrethinë, si dhe ngritjen e 48 bazave operative “në kufirin me Kosovën”.
Kurti shpreh shqetësimin për shërbimin e detyrueshëm ushtarak të vendosur nga Serbia, duke e cilësuar atë si një kërcënim serioz, i cili mund të çojë në shpërngulje masive të shqiptarëve.
“Represioni i vazhdueshëm dhe sistematik ndaj komunitetit shqiptar në Luginën e Preshevës është në kundërshtim me vlerat evropiane dhe demokratike. Veprimet e Serbisë ndaj shqiptarëve janë në kundërshtim me parimet e demokracisë, të drejtave të njeriut dhe sundimit të ligjit dhe kërkojnë reagim dhe veprim urgjent nga Bashkimi Evropian dhe komuniteti ndërkombëtar”, shkruan i pari i qeverisjes kosovare. /tesheshi.com/
