Kryeministri i Kosovës Albin Kurti, tha se tensionet në veri të Kosovës do të vazhdojnë nëse demokracitë perëndimore lejojnë Serbinë të vazhdojë me ëndrrat e vjetra, të cilat po bëhen makth për fqinjët e Serbisë, por edhe për vetë popullin serb.
Para takimit me presidentin serb Aleksandar Vuçiç në Bruksel më 18 gusht, Kurti tha se çdo zgjidhje duhet të ketë “njohjen reciproke në qendër”.
“Unë mendoj se problemi i Beogradit është se ai thjesht vazhdon me ëndrrat e tij të vjetra, të cilat po bëhen makth për fqinjët e Serbisë, por edhe për vetë popullin serb”, tha Kurti për Financial Times.
Në këtë kontekst, Kurti ka folur edhe për ndikimin rus në marrëdhëniet ndërmjet Kosovës dhe Serbisë.
“Jemi të shqetësuar, por nuk kemi frikë. Se si do të zhvillohet situata varet shumë nga qëndrimi i demokracive perëndimore ndaj Beogradit”, tha ai.
Kurti tha se “ajo që dëshiron Serbia janë fondet evropiane, armët ruse, investimet kineze dhe toleranca amerikane”.
“Nëse demokracitë perëndimore nuk e lejojnë më këtë, zgjidhja do të jetë shumë më e lehtë për t’u arritur. Por nëse (serbët) lejohen të luajnë këtë lojë, ky tension do të vazhdojë”, tha Kurti.
Kurti e përshkroi nacionalizmin serb dhe interesat ruse si “e njëjta gjë”, duke shtuar se rënia e njërës do të dobësonte tjetrën.
“Putini dëshiron të dëshmojë se ndërhyrja e NATO-s në Kosovë ishte një sukses i përkohshëm. Por ne jemi dëshmitarë se Kosova është këtu për të qëndruar”, tha kryeministri i Kosovës. /tesheshi.com/
