Kryeministri i Kosovës Albin Kurti tha nga Athina se vendet e Ballkanit Perëndimor kanë nevojë për Procesin e Berlinit për të ecur drejt Bashkimit Evropian, duke dhënë të nënkuptuar se ai nuk pajtohet me “Ballkanin e Hapur” pikërisht për këtë arsye, duke i parë të dy proceset si kundërvënëse. Ndërsa për Ramën, janë e njëjta gjë.
Siç njoftojnë nga Qeveria e Kosovës, Kurti në ditën e parë të tryezës së organizuar nga qeveria greke dhe gazeta Economist ka thënë se Procesi i Berlinit mund të sjellë “një valë që do të ngrinte të gjitha velat në Ballkanin Perëndimor”.
“Është një iniciativë me Bashkimin Evropian si vlerë dhe mekanizëm”, tha kreu i Qeverisë së Kosovës.
Ai ka vlerësuar se “Republika e Kosovës është një sukses i dyfishtë, së pari ndërhyrja e Perëndimit dhe NATO-s në vitin 1999 për të ndalur gjenocidin serb”.
Dhe së dyti, është një histori suksesi sa i përket rritjes ekonomike dhe demokracisë cilësore, të cilat shkojnë paralelisht”, tha Kurti.
Ai shtoi se për shkak të “ndryshimeve demokratike”, Kosova vitin e kaluar ka pësuar “rritje më të lartë ekonomike që nga pavarësia” prej 10.53 për qind, se eksportet janë rritur për 83.6 për qind dhe fluksi i investimeve të huaja për 21 për qind.
Duke folur për dënimin e pushtimit rus në Ukrainë, Kurti tha se Kosova “nuk mund të jetë neutrale” për këtë çështje. /tesheshi.com/
