Kryeministri i Kosovës, Albin Kurti, i ka dërguar sot një letër KFOR-it dhe EULEX-it, në të cilën kërkon që ta informojnë nëse dhe kur do të ndërmarrin veprime lidhur me barrikadat. Ai ka thënë se nëse KFOR-i nuk i largon, do ta bëjë Prishtina.
Ai ka deklaruar se nëse nuk planifikojnë diçka të tillë, Prishtina ka një plan të detajuar që t’i largojë vetë.
“I kemi dhënë kohë KFOR-it pikërisht sepse liria e lëvizjes nga pozita e KFOR-it konsiderohet vlerë themelore”, tha Kurti.
Pak para takimit të sotëm mes Kurtit dhe përfaqësuesve të KFOR-it dhe EULEX-it, është bërë e ditur se Policia e Kosovës ka nënshkruar kontratë në vlerë prej 124 mijë eurosh për të marrë me qira “makineri të rënda” nga një kompani private që merret me grimcimin e gurëve, por nuk është specifikuar se për çfarë qëllimi policia do t’i përdorte ato. /tesheshi.com/
