Në një intervistë për BBC, Kryeministri Albin Kurti ofroi “recetën” e zgjidhjes së krizës në veri, ku sipas tij serbët do duhet që të ndalin dhunën ndaj institucioneve dhe më pas të ulen në bisedime për të diskutuar deri në zgjedhjet e ardhshme në katër komunat.
“Nëse këto ndërtesa nuk janë për kryetarët për kënd duhet të shërbejnë atëherë. Kryetarët janë në zyrat e tyre. Ne mund të rishikojmë largimin e Policisë së Kosovës nga këto ndërtesa, por së pari bandat e dhunshme kriminale të cilat kanë sulmuar dhe plagosur gazetarët, policinë tonë dhe ushtarët e NATO-s, duhet të kthehen në Serbi ose në burg. Jam i gatshëm të dëgjoj propozimet për zgjedhje të parakohshme, por pasi që të vendoset sundimi i ligjit në vend”, arsyetoi i pari i qeverisjes kosovare.
Lidhur me direktivat amerikano-europiane për tërheqje të Prishtinës, Kurti tha se ai s’mund të bëjë kompromise të tilla.
“Nuk mund të bëjë kompromise për Republikën demokratike, duke qenë kryeministri i vendit më demokratik në Ballkanin Perëndimor, me policinë më profesionale e cila është e orientuar nga Perëndimi.
Ne i konsiderojmë SHBA-të, BE-në, Britaninë e Madhe, aleatë dhe miq të pakontestueshëm dhe u jemi shumë mirënjohës për lirinë dhe pavarësinë tonë dhe për zhvillimin e demkoracisë. Gjithsesi ne nuk mund tua dorëzojmë Republikën tonë policisë fashiste e cila paguhet nga autokratët në Beograd, i cili dikur ka qenë ministër i propagandës së Millosheviçit”, tha ai. /tesheshi.com/
