Në vijim të reagimeve ndaj “Open Balkans”, kryeministri Kurti, një kundërshtar i rreptë i saj, tha se për të pasur “Ballkan të Hapur”, Serbia është ajo që duhet të hapet ndaj Kosovës.
“Ballkani Perëndimor ende i paintegruar në BE përbëhet nga 6 shtete, me ç’rast këto s’mund të trajtohen bashkë.
Ka shtete në Ballkanin Perëndimor që janë në anën e Ukrainës, dhe kemi shtete si puna e fqinjit tonë verior që është në anën e federatës ruse dhe presidentit despotik të saj.
Për të pasur Ballkan të Hapur, është Serbia ajo që duhet të hapet ndaj Kosovës”, tha Kurti.
Ai theksoi se Kosova do të përfshihet në të gjitha ato nisma rajonale ku trajtohet barabartë.
“Gatishmëria dhe interesimi ynë për bashkëpunim rajonal shprehet me mbështetjen tonë për Procesin e Berlinit dhe angazhimin tonë në tregun e përbashkët rajonal. Në këtë bashkëpunim ne duam të kemi barazi të palëve e të cilin e gjejmë pikërisht në Procesin e Berlinit. Nuk duam zëvendësim të bashkimit evropian, si do që të quhet ai, qoftë kjo edhe ‘Ballkan i Hapur’”.
Duke pretenduar se projekti është joeuropian, Kurti tha se BE-ja është fati i Kosovës. “Evropa kontinenti ynë, dhe për këtë jemi të palëkundur”.
Ndërsa për raportet me Shqipërinë dhe kryeministrin Edi Rama, Kurti tha se i ka të shkëlqyera.
“Ndërkaq me Shqipërinë kemi marrëdhënie të shkëlqyera dhe pas dy javëve kemi një mbledhje të përbashkët të dy qeverive”. /tesheshi.com/
