Pas një mbledhje qeverie, kryeministri Albin Kurti bëri me dije se ç’diskutoi një ditë më parë me homologun Edi Rama, në një takim mes tyre në Tiranë.
“Para është siguria kibernetike. Kjo ka qenë tema e diskutimit tonë dhe isha shumë i interesuar të marrë vesh sa më shumë për përvojën e tyre me sulmet e fundit që kanë qenë me të vërtetë shumë të dëmshme e kriminale.
Tema e dytë ka qenë sfidat e energjisë në javët e muajt në vijim në kuptimin e furnizimit të qëndrueshëm dhe të çmimeve të përballueshme ku ju e dini se KEK dhe KESH bashkëpunojnë ngushtë, ne tash gjatë verës u kemi dhënë shumë energji elektrike në Shqipëri në mënyrë që ata të na ndihmojnë pastaj gjatë dimrit dhe kemi diskutuar për situatën energjetike në përgjithësi.
Tema e tretë ka qenë përgatitjet në dritën e rifillimit të Procesit të Berlinit, kësaj radhe me kancelarin e ri gjerman, Olaf Scholz, sepse ju e dini që takimet e mëhershme në kuadër të Procesit të Berlinit janë bërë me zonjën Merkel e tashmë për herë të parë bëhet nga kancelari Scholz dhe ka shumë punë të ekipeve tona dhe shumë bashkëpunim paraprak drejt mbledhjes së radhës së Procesit të Berlinit”, tha Kurti.
Ndërsa nëse u diskutua apo jo mbi Ballkanin e Hapur, ai dha një përgjigje ironike në trajtë hajgareje.
“Në drekën që kemi pasur dje nuk është përmendur Open Balkans, ose Open Balkan – nuk e di a është me “s” në fund apo pa “s” – por ajo që mund të them është se kemi diktuar për përgatitjet sa i përket Procesit të Berlinit”, tha Kurti. /tesheshi.com/
