Shqipëria e Kosova u bënë bashkë në Tiranë, në parlament, në një sesion të përbashkët në kuadër të festës së Pavarësisë.
Kryeministrat respektivë, Albin Kurti e Edi Rama, përcollën mesazhe kombëtariste, duke i mëshuar unitetit mes shqiptarëve në rajon.
Kurti ceku si shqetësim kombëtar ikjen e të rinjve, në të gjithë hapësirat në nivel rajonal, por u tregua entuziast për të ardhmen.
“Dua t’u dërogj një mesazh të gjithë atyre që kanë marrë udhën e dhimbshme të kurbetit; kjo ditë është e juaja. Mërgimtarët janë mbështetja më madhe ekonomike për vendet tona por edhe burim kulture që e marrin në shoqëritë e zhvilluara. Atje nuk po shkoni për qejf, por prej brengës.
E di që ne ende nuk kemi bërë mjaftueshëm t’u kthejmë besimin në institucione në shtet në politikë që ju të mendoni rritjen e fëmijëve tuaj në atdhe. Nuk kemi bërë mjaftueshëm, por këtë betejë do ta bëjmë deri në fund dhe do ta fitojmë edhe me ndihmën tuaj.
Shqipëria bëhet Kosova bëhet, trojet ku jetojnë shqiptarë në Mal të Zi e luginë do të bëhen. Puna është rruga jonë, nderi e besa janë cilësitë tona: ne do t’i tregojmë botës se ashtu siç po nxjerrim këngëtarë, shkencëtarë, sportistë e afaristë ashtu do të bëjmë shtetin dhe demokracinë e suksesshme”.
Nga ana tjetër, Rama veçoi faktin se bota shqiptare në rajon është më mirë si kurrë gjeopolitikisht, duke besuar se Kosovën e presin ditë të mira lidhur me njohjen.
“Besoj se njohja e saj përfundimtare do të vij më herët sesa vonë, dhe se Kosova nuk do të presë aq shumë sa pavarësia për t’u njohur ndërkombëtarisht dhe për të qenë e pranishme në çdo instance të botës ku ne jetojmë.
Më mbresëlënëse është pamja në Maqedoninë e Veriut, që ishte vendi ku gjuha shqipe shihej si ajo e një palë të padëshirueshme, kur flamuri jonë shihej si provokim.
Në 110-vjetorin e pavarësisë, aty shqipja është gjuhe zyrtare, me pjesëmarrjen më të madhe shqiptare në institucione dhe me kryetarin e parlamentit shqiptar. Pak do të mendonin që Mali i Zi do të mendonin se kryeministri do të ishte shqiptar”. /tesheshi.com/
