Pas gati dy muajsh negociata, e një ditë para konstituimit të Kuvendit të ri të dalë pa zgjedhjeve të 6 tetorit, Albin Kurti e Isa Mustafa kanë dështuar të bien dakort mbi atë që mund të quhet dhe ironikisht si “tepsia” e Kosovës, pra ndarja e pushtetit, ku ai, emri i presidentit, ka qënë dhe ngërçi më i pakapërcyeshëm.
Në fillim ishte kreu i Vetëvendosjes, i cili sqaroi opinionin mbi arsyet e mosdakortësisë, me idenë për ta provuar sërish, me kusht që vendi mos shkojë edhe njëherë në zgjedhje të parakohshme.
E pas video-mesazhit të Kurtit, reagoi Isa Mustafa, të cilit hiç nuk i pëlqeu që kryevetëvendosësi iu drejtua opinionit
“Negociatat nuk kanë qenë të lehta dhe partneri në tavolinë, Lëvizja Vetëvendosje, në disa raste, i ka shpërfillur rregullat për të cilat kishim rënë dakord.
Të tillë e kam parë VV-në edhe sonte me video-mesazhin e Kryetarit të Vetëvendosjes, z.Albin Kurti.
Për LDK-në dhe për mua, negociatat nuk kanë dështuar.
Ka dështuar strategjia e Vetëvendosjes për ta siguruar para publikut epitetin e palës parimore dhe gjeneroze në negociata dhe për t’ia hedhur fajin LDK-së.
Asnjë prej kërkesave tona nuk mund dhe nuk duhet të trajtohet si kërkesë ndaj Vetëvendosjes, për shkak se Vetëvendosja nuk i ka fituar të gjitha përgjegjësitë, ajo ka fituar rreth 1/4 e votave dhe jo më shume, dhe pothuajse aq ka fituar dhe LDK-ja. Prandaj, kërkesat tona kanë konsistuar dhe do të konsistojnë në ndarjen e balancuar të përgjegjësive, konform rezultatit të zgjedhjeve të 6 tetorit”, shkruan ndër të tjera Mustafa.
“Video-mesazhin e sotëm, Albin Kurti dhe Vetëvendosje, përpara se t’ua drejtonin qytetarëve, është dashur të na i thonë neve të LDK-së, meqë na konsiderojnë partnerë.
Gjithsesi, mesazhin e kemi të qartë edhe ne në LDK, por besoj edhe qytetarët e Kosovës.Ndryshe nga deklarimet e tyre publike, Vetëvendosja tregoi sonte se është gati të zotohet për ta mbështetur kandidatin e propozuar nga LDK-ja për President të Kosovës, vetëm se kërkon më shumë hise në qeveri. Ky nuk është parim, por tentim për të përfituar më shumë”, u ankua njeriu që drejton LDK.
Kujtojmë se për ironi, suksesi i parë i zgjedhor VV-së, ka qenë fitorja e Prishtinës në lokalet e pak viteve më parë, duke ia rrëmbyer IsaMustafës me Shpend Ahmetin si kandidat. /tesheshi.com/
