Kurti: Deeskalim në veri të Kosovës

Kur nuk planifikohen protesta të dhunshme të organizuara nga Beogradi zyrtar, nuk ka përshkallëzim në veri të Kosovës, tha të mërkurën kryeministri Albin Kurti, duke pohuar se aktualisht është arritur deeskalim në atë pjesë të vendit.

“De-përshkallëzimi në katër komuna në veri është rezultat, nga njëra anë, i arrestimit të elementëve të dhunshëm që sulmuan policinë tonë, gazetarët dhe ushtarët e KFOR-it, dhe nga ana tjetër, largimi i disa ekstremistëve të dhunshëm në Serbi. Kanë kaluar dy muaj nga ngjarja e fundit e rëndë dhe akoma më shumë nga protestat e dhunshme”, tha ai në seancën e Qeverisë së Kosovës në Prishtinë.

Në fund të qershorit, Bashkimi Evropian miratoi masa ndaj Kosovës për shkak të tensioneve në veri.

“Njohja reciproke është e nevojshme”

Kurti tha se anëtarësimi i Kosovës në BE nuk ka alternativë.

“Të gjitha vendet që aspirojnë anëtarësimin në BE duhet të zbatojnë demokracinë, sundimin e ligjit, respektimin e të drejtave të njeriut dhe fqinjësinë e mirë. Për atë fqinjësi të mirë, demokratike dhe evropiane, është e nevojshme njohja reciproke [e Kosovës dhe Serbisë], de jure dhe de facto, si dhe të drejtat e pakicave, në mënyrë simetrike dhe sipas konventave evropiane”, ka theksuar Kurti. /tesheshi.com/