Qeveria e Kosovës ka miratuar vendimin që qytetarët e Bosnjës dhe Hercegovinës të udhëtojnë në Kosovë me letërnjoftim biometrik nga 1 janari 2025, ka bërë të ditur kryeministri Albin Kurti.
Albin Kurti tha se shpreson që Bosnja dhe Hercegovina ta ratifikojë sa më shpejt Marrëveshjen për Lëvizjen e Lirë në Ballkanin Perëndimor.
“Bllokada nga entiteti RS(Republika Srpska) ua ka hequr të drejtën e lëvizjes së lirë qytetarëve të Bosnjë-Hercegovinës dhe Kosovës me karta identiteti për një kohë të gjatë, në një kohë kur i gjithë rajoni po udhëton lirshëm drejt Bashkimit Evropian.
Ndërsa i japim fund pritjes për qytetarët e Bosnjë-Hercegovinës, ne mbetemi me shpresë se Bosnja dhe Hercegovina do të jetë në gjendje ta ratifikojë marrëveshjen sa më shpejt që të jetë e mundur në mënyrë që i gjithë rajoni të gëzojë lirinë e lëvizjes.
Jemi të bindur se ky vendim do të rrisë lidhjet ndërmjet Kosovës dhe Bosnjë e Hercegovinës dhe do të rrisë mundësitë për bashkëpunim dhe do të promovojë shkëmbimet në arsim, kulturë, sport, ekonomi dhe fusha të tjera me interes të përbashkët”, ka shkruar Kurti në Facebook.
Kurti e bëri të ditur vendimin në tetor gjatë një samiti në Berlin. /tesheshi.com/
