Kryeministri i shkarkuar, por ende në detyrë Albin Kurti, ka vijuar të sulmojë ashpër presidentin Thaçi, i cili nga ana e tij ka mandatuar tjetër emër për të qenë në vend të tij në krye të qeverisë – Abdullah Hotin nga LDK – pezulluar përkohësisht nga Gjykata Kushtetuese.
Por në akuzat e radhës ndaj kreut të shtetit, “armik” epik i tij në politikë, Kurti ka përdorur ironi therrësë si dhe fjalën diskretituese “helaq”.
“Regjimi i vjetër po shpurdh nëpër studiot televizive. Ata refuzojnë ta kuptojnë se koha e tyre ka mbaruar. Po orvaten të rikthehen, përmes trysnisë mbi gjyqtarët e Gjykatës Kushtetuese.
Sa herë që ne ua godasim korrupsionin, ata piskasin ‘Amelika, Amelika! Gleneli, Gleneli!’.
Duan ta dëmtojnë imazhin e ShBA-ve në Kosovë, ta keqpërdorin atë si strehë për ultësinë e tyre.
Një popull nuk iu nënshtrua një njeriu. Dhe, e bëri ndryshimin me 6 tetor. As qeveria në detyrë nuk i nënshtrohet këtij Presidenti helaq.
Ditët në vijim përcaktojnë dekadën e tretë të shekullit XXI. Në cilën anë je ti?”, shkroi Kurti.
Ishte ky një reagim ndaj asaj çfarë tha Thaçi në një emision televiziv, kur, referuar vetes dhe rolit politik në këto vite, veçoi duke thënë se “…institucionet tash e 20 vite i kanë sjellë Kosovës lirinë, pavarësinë e Kosovës, 115 njohje ndërkombëtare, e kanë integruar në rreth 20 organizata ndërkombëtare, kanë themeluar ushtrinë por ky regjimi i vjetër-ri Kurti çka i solli Kosovës, vilat janë standardet e tij? Janë molotvi, gurët, shemba e institucioneve, vezët, minahedhësit, zolla, djegia e institucioneve, dhuna”. /tesheshi.com/
