Në një pozitë mjaft të vështirë është ministri britanik i Mbrojtjes Ben Wallace, i cili ka bërë një gabim të madh duke rënë në grackën e dy shakaxhinjve të njohur rusë, të cilët dyshohen se punojnë, me stilin e tyre, për Kremlinin.
Fjala është për dyshen e njohur Vovan dhe Lexus(Vladimir Kuznetsov dhe Alexei Stolyarov), të cilët sajuan një bisedë me Ben Wallace. Ky i fundit ka menduar se po bisedonte me kryeministrin e Ukrainës.
https://youtu.be/RZKrT4k7MMk
Në video shihet ministri britanik duke folur nga makina. Sipas skenarit të dyshes ruse, supozohet se kryeministri i Ukrainës Denis Smihal e ka telefonuar për t’i kërkuar më shumë raketa antitank NLAW, duke i thënë se “dështuan ato që keni dërguar më parë”, që sipas mediave britanike konsiderohet false.
“Nuk mendoj se tonat kanë dështuar. Ne ju dhamë mbi 4000. Më shumë po vijnë. Unë flas me kolegun ukrainas të mbrojtjes çdo ditë,” tha Wallace, pa e ditur se me kë fliste në të vërtetë.
NLAW-të prodhohen në Belfast nga prodhuesi francez i armëve Thales, i cili mendohet se ka rritur prodhimin për t’u marrë me problemet e furnizimit.
Wallace u përpoq të kundërsulmonte mbrëmë, duke thënë se “gjërat duhet të shkojnë keq për Kremlinin” nëse ai përdor “video të rreme”.
Truku është postuar në kanalin e dyshes në YouTube, me mbi 121 mijë abonentë, ndërsa janë premtuar video të plota në ditët në vijim.
Sipas përshkrimit të klipit të parë, “më 17 mars, Vovan dhe Lexus patën një video-telefonatë me ministrin britanik të Mbrojtjes Ben Wallace, në emër të kryeministrit të Ukrainës, Denis Smihal”.
Edhe pse mohojnë të jenë në shëerbim të Kremlinit, pranojnë se nuk do ta tallnin Putinin, pasi nuk duan të dëmtojnë vendin e tyre.
Në të njëjtën kohë, Downing Street pretendon se truket ndaj ministrave britanikë ishin një përpjekje e regjimit të Putinit për të çorientuar veten nga problemet ushtarake në Ukrainë. “Ne po shohim një seri historish dhe gënjeshtrash çorientuese nga Kremlini, që pasqyrojnë dëshpërimin e Putinit, ndërsa ai përpiqet të fshehë përmasat e konfliktit dhe dështimet e Rusisë në fushën e betejës”, tha një zëdhënës i kryeministrit britanik.
Në të njëjtën kohë, kreu i Forcave të Armatosura britanike këmbënguli që Wallace të ndiqte protokollet dhe të mos diskutonte çështje sekrete. Sipas tij, dyshja e shakaxhinjtë rusë mund të kenë arritur të anashkalojnë sigurinë e disa departamenteve.
https://youtu.be/xmAEcZ4KEqc
Burimet e qeverisë britanike flasin për një komplot rus, duke përmendur nivelin e kompleksitetit të mashtrimit.
Telefonata me video erdhi pas një e-maili që dyshohet se është dërguar nga një ndihmës në ambasadën ukrainase në një departament qeveritar dhe më pas i është dërguar Ministrisë së Mbrojtjes.
Sipas Times, Wallace u pyet për mundësinë që anijet luftarake britanike të shkojnë në Detin e Zi dhe nëse Ukraina duhet të marrë armë bërthamore ose të bashkohet me NATO-n.
Megjithatë, burime të larta të Ministrisë së Mbrojtjes kanë shprehur frikën se Moska mund të përpiqet të kombinojë komentet e Wallace në një përpjekje për ta vënë atë në një pozitë të vështirë. Tashmë ka nisur një hetim për të zbuluar sesi shakaxhinjtë kanë arritur të flasin me të. /tesheshi.com/
