KQZ, e përkthyer politikisht si “qeveria”, ka vendosur që KZAZ-të e 30 qershorit t’i zhvendosë gjetiu, ato që u bastisën në afro katër ditë aksion opozitar, deri dhe me përplasje fizike e zjarrvënie. Do i çojë në të tjera ambiente, atje ku opozita nuk ndihet “pronare” dhe kjo vlen për ato bashki ku ajo drejton, e ku pati pra dhe incidente.
Por kur ndodh kjo? Kjo ndodh pas konsumimit të atyre skenave që u panë, ku drejtues bashkish të PD-LSI e militanca përkatëse, iu sulën KZAZ-ve me “ç’dekretin e dekretit” të Metës në dorë, si një përpjekje për të pamundësuar 30 qershorin.
Pati përplasje, incidente, deri dhe dëme materiale, ku simbol i tyre që flaka në shkollën “Shejnaze Uka”në Shkodër. E tani gjithçka nis nga e para; me KZAZ “të reja”. E mbi të gjitha, kjo ndodh pasi një reagim ndërkombëtar në korr, ku u dënua ashpër aksioni i dhunshëm opozitar.
Të premten, para protestës së opozitës, të gjitha deklarimet, që nga ajo e Ambasadës Amerikane e çfarë pasoi, pos që paralajmëronin mbajtje përgjegjësie nëse do kish ushtrim dhune – çka solli protestën më paqësore të opozitës që nga djegia e mandateve – por paralel dënonin dhe atë çfarë ndodhi me KZAZ-të. Prej atë ditë, këto të fundit “kanë rënë rehat”. Që do të thote, se sido-sido, opozita vijon ta “njeh frikën” ndaj faktorit ndërkombëtar dhe ka një ndjeshmëri ende aktive ndaj qëndrimeve të tyre.
Nga ana tjetër, ajo duket se bie lehtësisht në kurthin e skemave të mazhorancës, e cila, edhe pse vuan imazhin e përlyer të vendit si pasojë e protestave plot “flakë e tym” të opozitës, kujdeset që këtë imazh ta shndërrojë në bumerang për kët ëtë fundit.
Shumë mirë mund të ndodhte që zhvendosja e KZAZ-ve – ato dokumentacion janë – të bëhej para sulmit opozitar. Por jo! Duhet të konsumoheshin ato skena, që të vinte më pas dhe reagimi ndërkombëtar, siç dhe ndodhi. Duhet të konsumoheshin ato skena dhe për një çlirim psikologjik të frustrimit politik të opozitës, që më pas të vinte qetësia por dhe lodhja. Dhe tani jemi në stadin që KZAZ-të e 30 qershorit…janë gati! /tesheshi.com/
