Nevruzi, festa e shndërruar në simbol të identitetit kurd, kremtohet sot krejt ndryshe në tërë hapësirat turke të banuara nga kurdët. Vëmendja është përqendruar në Dijarbakër, në qytetin juglindor të Turqisë, ku mijëra njerëz janë në pritje të mesazhit të Abdullah Oxhalanit, udhëheqësit të PKK-së, Partisë së Punëtorëve të Kurdistanit, i cili që nga viti 1999 është pas hekurave. Një grup deputetësh të HDP-së, të partisë që përfaqëson interesat e kurdëve, sapo i kanë bërë një vizitë Oxhalanit në burgun e ishullit të Imrallësë, dhe kanë marrë prej tij mesazhin që pritet ta bëjnë të njohur sot.
Thirrja për çarmatimin e PKK-së, që shpresohet ta përshkojë mesazhin e Oxhalanit, do ta çonte më tej procesin e pajtimit, të nisur nga qeveria turke për t’i dhënë fund çështjes kurde.
Udhëheqësi kurd i burgosur e pati shpallur armëpushimin gjatë festimeve të Nevruzit në vitin 2013, si pjesë të përpjekjeve për pajtim, dhe sot pritet ta ushtrojë përsëri ndikimin e tij me thirrjen për çarmatim, apo me thirrjen e një kongresi të jashtëzakonshëm që do ta shqyrtonte këtë mundësi.
Procesi i pajtimit nisi në 2012-n me iniciativën e AKPsë, partisë në pushtet, pasi ish-kryeministri Rexhep Tajjip Erdogan deklaroi në dhjetor të atij viti se qeveria do të kryente bisedime paqeje me Oxhalanin. Parlamenti turk miratoi një projektligj në korrikun e vitit pasues, në mbështetje të procesit të pajtimit për t’i dhënë fund terrorizmit.
Kurdët e patën filluar në vitin 1984 fushatën e tyre të armatosur, në kundërvënie ndaj qeverisjes turke, gjatë së cilës janë vrarë më tepër 40.000 njerëz. Gjakderdhja ndaloi që me nisjen e bisedimeve, një arsye e fortë për të shpresuar në një zgjidhje politike.
Sot në Dijarbakër pritet të dëgjohet një mesazh shpresëdhënës, që do të shënonte nisjen e një pranvere të re në marrëdhënien e paqetë midis turqve dhe kurdëve. /tesheshi.com/
