Politikanët shqiptarë uruan besimtarët myslimanë për festën e Kurban Bajramit.
I pari që ka drejtuar një urim ishte kryeministri, Edi Rama, i cili përmes rrjetit social shkruan “gëzuar Kurban Bajramin, me këtë foto të Xhamisë së Beqarëve në Berat, një objekt i çmuar i trashëgimisë sonë kulturore, ku po fillon puna restauruese, bashkë me Teqenë e Helvetive, Xhaminë e Et’hem Beut në Tiranë dhe Xhaminë e Pazarit në Gjirokastër”.
Presidenti Ilir Meta zhvilloi një vizitë në Selinë e Komuniteti Mysliman Shqiptar, ku u prit nga kryetari, Skënder Bruçaj. Meta i përcolli urimet më të përzemërta për këtë ditë të shenjtë. Gjithashtu, Meta ishte për vizitë edhe në Kryegjyshatën Botërore të Bektashinjve ku u prit nga kryegjyshi Baba Edmond Brahimaj.
“Në këtë ditë të shenjtë dua të uroj të gjithë besimtarët mysliman, por edhe të gjithë qytetarët për sakrificat e tyre. Uroj që kjo ditë ripërtëritje besimi të ndihmojë për të çliruar shpirtrat nga brengat dhe vështirësitë e përditshme dhe njëkohësisht të japi më shumë forcë edhe besim për të ardhmen. Në këtë ditë sakrificash hyjnore dhe tokësore do të urojë për të gjithë shoqërinë tonë dhe për të gjithë familjet tona më shumë paqe, mirëqenie, harmoni, dhe mbi të gjitha, dashuri për njeriun dhe për njëri tjetrin”, – tha Presidenti Meta.
Një mesazh urimi për shqiptarët me rastin e Kurban Bajramit e ka bërë edhe kreu i opozitës, Lulzim Basha.
Nga selia e komunitetit mysliman të Shqipërisë, Basha tha se “kjo është edhe një ditë përkushtimi, zotimi dhe përkujtimi për përgjegjësitë e secilit për një shoqëri të drejtë dhe në veçanti për politikën”.
Ish-kryeministri, Sali Berisha, gjithashtu i është bashkuar urimeve për të gjithë besimtarët myslimanë me rastin e festës së Kurban Bajramit.
Berisha uron shqiptarët që Bajramin tjetër t’i gjejë më mirë. /tesheshi.com/
