Drejtues të Medresesë “Alaudin” në Prishtinë dhe kryeimami nga Xhamia e Madhe e Prishtinës “Sulltan Mehmed Fatih”, ku është bërë falja e namazit të Kurban Bajramit përveç urimeve me rastin e kësaj feste, kanë përcjell edhe një mesazh për drejtuesit e institucioneve duke kërkuar nga ata që të punojnë më shumë për fuqizimin e shtetësisë
Kryeimami i Bashkësisë Islame të Kosovës, Sabri Bajgora në mesazhin e Kurban Bajramit tha se sot me tepër se kurrë bota ka nevoje për paqe dhe harmoni, ndërsa ka kërkuar fuqizimin e shtetit.
“Nga ky vend i bekuar i ftoj të gjithë udhëheqësit tanë politike dhe qytetarët e Republikës se Kosovës që të punojnë dhe kontribuojnë edhe më shumë për ndërtimin dhe fuqizimin e mëtejmë të vendit tonë. Kontributi ynë për ndërtimin e një shteti funksional ku do të respektohet e drejta e çdo individi është amanet mbi amanetet dhe është detyrë e shenjtë”, tha Bajgora.
Në xhaminë e madhe në Prishtinë, në ligjëratën e tij, Jakup Çunaku, drejtor i Medresesë “Alaudin” në Prishtinë, tha se qytetarët në Kosovës në këtë ditë feste duhet të tregohen solidar për familjet në nevojë.
“Ju sot përmes sakrificës tuaj që do të bëni, do të mundësoni që festën e Kurban Bajramit ta gëzojnë edhe jetimët, njerëzit në nevojë, sepse vetëm kështu i shtohet kuptimi kësaj feste të shenjtë. Dobitë e fesë janë të panumëruara dhe njëra nga to është vlera e përmendjes së Zotit”, tha Çunaku.
Mesazhe urimi edhe nga krerët e shtetit…
Mesazhe urimi për besimtarët islamë kanë përcjellë edhe udhëheqësit e institucioneve më të larta dhe ata të partive politike.
Në urimin për këtë festë presidenti Thaçi përmes një postimi në Facebook ka uruar që Kurban Bajramit si festë e solidarizimit, humanizmit dhe bashkimit të qytetarëve, të sjellë sa më shumë gëzime, mirëkuptim dhe harmoni në familjet e të gjithëve.
“Kosova dhe qytetarët e saj krenohen me tolerancën ndërfetare dhe vlerat tjera që po kultivohen në shoqëri”, ka shkruar ai.
Ndërsa kryeministri Mustafa, në emër të qeverisë ka thënë se Festa e Kurban Bajramit e gjen shoqërinë tonë në përpjekje e sipër për të zhvilluar e forcuar rrugëtimin tonë, për zhvillim, paqe dhe integrime euroatlantike, tashmë të dëshmuar si të drejtë e të dobishëm për vendin tonë dhe qytetarët tanë.
“Qeveria e Republikës së Kosovës do të vazhdojë pandalshëm angazhimin për mbrojtjen dhe kultivimin e vlerave të dëshmuara për të mirën e lirisë, barazisë dhe tolerancës për të gjithë qytetarët e Kosovës”, ka deklaruar Mustafa. /tesheshi.com/
